Բուլղարահայերը հերթական ծեծկռտուքն են կազմակերպել, բայց այս անգամ Պլովդիվ քաղաքի ակումբներից մեկում։ «Վ Չաս» պարբերականը գրում է, որ միմյանց հասցեին ծաղրական արտահայտությունների փոխանակությունը վեճի էր վերածվել։

«Կրքոտ հայկական արյունը փոթորկեց։ Երկու տասնյակ մարդ յուրաքանչյուրն իր հերթին վճռեց, որ իր պատիվը վիրավորել են»,- նշում է պարբերականը։

Ոմանք ատրճանակ ունեին, մյուսները՝ դանակներ։ Ծեծկռտուքից տուժել է տեղի գործարար Մեսրոպյանի որդիներից մեկը։ 24-ամյա Յուրա Մեսրոպյանը մեկ տարի առաջ արդեն կալանավորվել էր կայանատեղիում ծագած վեճի ժամանակ գազով ատրճանակից մեկի դեմքին կրակելու համար։

Ականատեսների խոսքով, դրությունը փրկել է քրեական աշխարհում հայտնի Անգել Լիչկանովը։ Վերջինը չի հերքում, որ դժվարությամբ է կանխել զանգվածային ծեծկռտուքը։ «Կարող էր շատ վատ ավարտվել։ Դրությունը նախակաթվածային էր։ Ես երկու գիշեր չեմ քնել»,- ասել է նա։

Հայերը խաղաղության չիբուխը ծխել են հաջորդ օրը իտալական ռեստորանում։ «Խնդիր այլեւս չկա։ Հիմա կարող են միասին սեղանի շուրջ նստել ու խմել։ Հարցը լուծված է»,- հայտնել է Լիչկանովը։