Երեւանի Մալաթիա- Սեբաստիա վարչական շրջանի ընդհանուր իրավասության դատարանում այսօր՝ հունվարի 18-ին, ցուցմունք տվեց ապօրինի զենք կրելու մեջ մեղադրվող, «Հիմնադիր խորհրդարանի» անդամ Արմեն Միքայելյանը:
Ամբաստանյալը պատմեց, որ հուլիսին ամենօրյա հանրահավաք- երթեր էին իրականացվում՝ ի պաշտպանություն «Սասնա ծռեր» խմբի տղաների, եւ ինքը՝ որպես Հակաճգնաժամյին խորհրդի անդամ, հանրահավաքների կազմակերպիչներից էր եւ մասնակցում էր դրանց:
«Հուլիսի 26-ին հերթական հանրահավաք- երթից հետո տուն էի գնում, ծնողներիս ճանապարհելուց հետո պետք է շարունակեի ճանապարհս, բայց երբ մտանք ծնողներիս տան բակ, մի քանի մեքենա փակեցին մեր ճանապարհը, մոտ մեկ տասնյակ մարդ իջավ ու առանց որեւէ բան ասելու՝ ինձ քաշքշեցին ու ուժով նստեցրին մեքենան ու տարան: Ճանապարհին շղթայեցին ինձ, մեջքս սեղմեցին, որ շարժվելու որեւէ հնարավորություն չունենամ, ընթացքում զգացի, որ մեջքիս շրջանում կոշտ իրով սեղմեցին: Հետո երբ հասանք Մալաթիայի բաժին, մեքենայից իջնելիս ինչ-որ բան ընկավ շխկոցով, ես նայեցի ու տեսա, որ ատրճանակ է»,- պատմեց նա:
Արմեն Միքայելյանի պատմելով՝ ոստիկանության շենքում էլեկտրականություն չկար, նրան մի քանի հարկ բարձրացրել են մութ աստիճաններով, միջանցքներով, այնուհետեւ արդեն տարել են մի սենյակ, որտեղ նույնպես մութ է եղել: Այստեղ արդեն, ըստ ամբաստանյալի ցուցմունքի, նրան սեղմել են պատին եւ ինչ-որ կոշտ իր դրել մեջքի հատվածում. «Այնուհետեւ լույսերը վառվեցին, լիքը մարդ կար այդ սենյակում, բայց ոստիկանական համազգեստով մեկ կամ երկու հոգի հազիվ լիներ: Հետո զենքը հանեցին ու տեսա, որ այն նույն զենքն է, որը մեքենայից ընկավ, դրեցին ու արձանագրեցին, որ ինձ մոտ զենք կար: Ամբողջ ընթացքում ինչ-որ մեկը տեսանկարահանում էր բջջային հեռախոսով, սակայն երբ զենքը հանեցին, ես սկսել ասել, թե ինչ պայմաններում է այն հայտնվել, նկարողը հեռախոսը շրջեց այլ կողմ, իսկ ես նրան ասացի, որ ինձ վրա պահի, որպեսզի պարզ լինի, որ ես եչմ խոսում»:
Արմեն Միքայելյանը կրկին պնդեց, որ իր մոտ զենք չի եղել, այն ոստիկաններն են դրել իր գոտկատեղում: Նշենք, որ փորձաքննությամբ զենքի վրա հայտնաբերվել է ամբաստանյալի մատնահետքերը: Դատարանում նա սակայն պնդեց, որ դա պարզապես անհնարին է, քանի որ ինքը երբեք որեւէ առնչություն չի ունեցել այդ զենքի հետ, նույնիսկ ինքը զարմացել է, որ հարկադրաբար իր ձեռքն այդ զենքը չեն դրել:
Դատական նիստն ավարտվեց, հաջորդը նշանակվեց հունվարի 30-ին:
Հիշեցնենք, որ Արմեն Միքայելյանը ձերբակալվել էր հուլիսի 27-ին, երբ Երեւանի Խորենացի փողոցում ցույցից հետո ընտանիքով վերադառնալիս էր եղել տուն: Նրան մեղադրանք էր առաջադրվել ՀՀ ՔՕ 235 հոդվածով (ապօրինի զենք, զինամթերք պահել):
20 օր անազատության մեջ մնալուց հետո Արմեն Միքայելյանն ազատ էր արձակվել: