Հայաստանի ժողովրդական կուսակցության ղեկավար Ստեփան Դեմիրճյանն ու Գագիկ Ծառուկյանը հանդիպել են եւ քննարկել ընտրություններին մասնակցելու ձեւաչափը։ Այս տեղեկությունը NEWS.am–ի հետ զրույցում հաստատել է կուսակցության քարտուղար Գրիգոր Հարությունյանը։
«Հանդիպում եղել է եւ, բնականաբար, քննարկվել է ընտրությունների հետ կապված հարցեր, սակայն որեւէ որոշում դեռ չի կայացվել»,–ասել է Գրիգոր Հարությունյանը։
Նշենք, որ մամուլում արդեն շրջանառվում է, որ Ստեփան Դեմիրճյանը համաձայնել է միավորվել Գագիկ Ծառուկյանի ստեղծելիք դաշինքին, ինչի դիմաց նրան խոստացել են ընտրական ցուցակի 5–րդ տեղը։
Գրիգոր Հարությունյանը վստահեցրեց, թե ցուցակում զբաղեցնելու տեղի վերաբերյալ քննարկում չկա։
Ըստ որոշ տեղեկությունների՝ Ստեփան Դեմիրճյանը հանդիպել է նաեւ պաշտպանության նախկին նախարար Սեյրան Օհանյանի եւ նախկին արտգործնախարար Վարդան Օսկանյանի հետ։ Գրիգոր Հարությունյանը այս լուրը հերքեց։ Ընդգծենք, որ օրեր առաջ NEWS.am–ի հետ զրույցում Ստեփան Դեմիրճյանն անձամբ էր հերքում Գագիկ Ծառուկյանի հետ հանդիպելու լուրը, ավելին՝ պնդում էր, թե եթե քննարկումներ սկսեն, ապա առաջինը իրենց դաշնակից Հայ ազգային կոնգրեսի հետ։