Բրազիլիայի նախկին նախագահ Ժաիր Բոլսոնարուն, որը դատապարտվել է պետական հեղաշրջման փորձի համար, որովայնի ուժեղ ցավերով տնային կալանքից տեղափոխվել է հիվանդանոց։ Այս մասին ուրբաթ հայտնել է մայրաքաղաք Բրազիլիայի հիվանդանոցներից մեկը, գրում է CNN Brasil-ը։

Բուժհաստատության տվյալներով՝ 71-ամյա քաղաքական գործիչը հոսպիտալացվել է լրացուցիչ հետազոտություններ անցնելու համար։ Նրա որդին՝ Կառլոս Բոլսոնարուն, X սոցիալական ցանցում գրել է, որ հոր մոտ ախտորոշվել է աղիքային գրեթե ամբողջական անանցանելիություն։

2018 թվականին՝ նախընտրական քարոզարշավի ժամանակ, Բոլսոնարուն որովայնի շրջանում դանակի հարված է ստացել։ Ծանր վնասվածքից հետո նա մի քանի անգամ վիրահատվել է։

Կառլոս Բոլսոնարուն հոր առողջական վիճակի վատթարացումը կապել է տնային կալանքի պայմանների հետ։ Նրա խոսքով՝ նախկին նախագահի վիճակը վատթարանում է «օրեցօր՝ տեղաշարժի ազատության բացակայության և ամենօրյա հոգեբանական խոշտանգումների պատճառով»։

Բոլսոնարուն մեղավոր է ճանաչվել նախագահական ընտրություններում պարտությունից հետո պետական հեղաշրջման փորձի համար։

Քաղաքական գործչի մյուս որդին՝ նախագահի նախկին թեկնածու Ֆլավիո Բոլսոնարուն, հոկտեմբերին մեկնել է ԱՄՆ՝ անտեսելով երկրից դուրս գալու՝ դատարանի սահմանած արգելքը։ Դա տեղի է ունեցել ընտրություններում նրա կրած պարտությունից երկու օր անց։ Երկրորդ փուլում նա պարտվել է Բրազիլիայի գործող նախագահ, ձախ ուժերի ներկայացուցիչ Լուիս Ինասիո Լուլա դա Սիլվային։