Կատարական Al Jazeera հեռուստաընկերությունը խոսքի ազատությունը ճնշելու փորձ է անվանել հեռուստաալիքի փակման պահանջը, որը Կատարի իշխանություններին ներկայացրել են մի խումբ արաբական երկրներ, փոխանցում է ՏԱՍՍ-ը։
«Մենք՝ հեռուստացանցի աշխատակիցներս, համարում ենք, որ Al Jazeera-ի փակման ցանկացած փորձ ոչ այլ ինչ է, քան տարածաշրջանում տեսակետների ազատությունը խլացնելու ու տեղեկություններ ստանալու մարդկանց իրավունքը սահմանափակելու փորձ։ Մենք հայտնում ենք որեւէ կառավարության կամ իշխանության ճնշմանը չենթարկվելով՝ պրոֆեսիոնալ լրագրությամբ զբաղվելու մեր իրավունքի մասին»,- ասվում է հեռուստաընկերության հայտարարության մեջ։
Արաբական երկրները՝ այդ թվում Սաուդյան Արաբիան, Եգիպտոսը, ԱՄԷ-ն ու Բահրեյնը, որոնք մինչ այդ խզել էին Կատարի հետ դիվանագիտական հարաբերությունները, այդ երկրին են ներկայացրել 13 կետից բաղկացած պահանջների ցանկ։
Այդ պահանջներից է Իրանի հետ դիվանագիտական հարաբերությունների խզումը, Al Jazeera-ի փակումը, Թուրքիայի հետ ռազմական համագործակցության դադարեցումն ու երկրում թուրքական ռազմաբազայի փակումը։
