Բլոգեր Ալեքսանդր Լապշինի կալանավորումը գլխացավանք էր Ադրբեջանի համար, քանի որ հասկանալի է, որ 21-րդ դարում անհնար է ճաղերի ետեւում երկար պահել լրագրողին այն բանի համար, որ նա արտահայտել է իր տեսակետը։ Նման տեսակետ է հայտնել փաստաբան Արա Ղազարյանը՝ NEWS.am-ի թղթակցի խնդրանքով մեկնաբանելով բլոգերին ներում շնորհելու հետ կապված իրավիճակն ու նրա հայտարարությունն այն մասին, որ ադրբեջանական բանտում իրեն փորձել են սպանել։
«Հիմա լրատվամիջոցներում ու սոցիալական ցանցերում հայտնված հայտարարությունների հիման վրա որեւէ բան մեկնաբանելը դժվար է, քանի որ անհայտ է, թե ինչն է նա ասում, ինչն է գուցե նրա «անունից» ասվում, ինչպես նախկինում էր»,- հիշեցրել է փաստաբանը։
Ընդ որում նա շեշտել է, որ 21-րդ դարում լրագրողին կամ բլոգերին արտահայտված տեսակետի համար ճաղերի ետեւում պահել չի հաջողվի։ «Ադրբեջանը գնում է իր «ավագ եղբոր» ՝Թուրքիայի հետքերով՝ նրա տխրահռչակ 301 հոդվածով հանդերձ (թուրքական ինքնություն)։ Եվ Թուրքիան պարբերաբար խնդիրներ է ունենում Արեւմուտքի հետ, բացի այդ՝ այդ հոդվածը լիարժեք կիրառել չի հաջողվում։
Արա Ղազարյանը հիշեցրեց, որ հայտնի են ադրբեջանական բանտերում հայ գերիների մահվան մի քանի դեպքեր։ «Բայց անհնար է մշտապես ոչնչացնել անցանկալի մարդկանց»,- հավելեց նա։ Ընդհանուր առմամբ, համարում է Ղազարյանը, Լապշինը Ադրբեջանի իշխանությունների համար եղել է գլխացավանք ու նրանք որոնել են ելք ստեղծված իրավիճակից, որպեսզի ինչ-որ ձեւով ազատվեն նրանից։
2016-ի վերջին Լապշինը ձերբակալվել է Մինսկում Ադրբեջանի հարցումով, որը նրան «սեւ ցուցակում» էր ընդգրկել ՝ առանց Բաքվի հետ համաձայնեցնելու ԼՂՀ այցելելու համար։ Բելառուսի գլխավոր դատախազությունը որոշել է բավարարել Ադրբեջանի հարցումն ու արտահանձնել Լապշինին։ Բաքվում դատարանը Լապշինին դատապարտել էր երեք տարվա ազատազրկման։
Սեպտեմբերի 11-ին Ադրբեջանի նախագահ Իլհամ Ալիեւը կարգադրել է ներում շնորհել Իսրայելի քաղաքացի Ալեքսանդր Լապշինին։ Միաժամանակ պարզվել է, որ բանտում Լապշինին քիչ էր մնացել ինքնասպանության հասցնեին։
