Լիբանանի նախկին վարչապետ Սաադ ալ Հարիրիին, որը նոյեմբերի 3-ին հրաժարական է ներկայացրել, Էր Ռիադում են պահում սաուդյան իշխանությունները: Բեյրութը մտադիր է դիմել արտասահմանյան երկրներին՝ նրա վերադարձն ապահովելու համար, հայտնում է Reuters-ը: Այս մասին նշել է Լիբանանի կառավարության բարձրաստիճան ներկայացուցիչը:
Հարիրիի անսպասելի հրաժարականը, որի մասին նա հայտարարեց Սաուդյան Արաբիայում գտնվելիս, Լիբանանում լուրջ քաղաքական ճգնաժամի պատճառ է դարձել եւ երկրին նետել է Սաուդյան Արաբիայի ու Իրանի միջեւ տարածաշրջանային դիմակայության մեջ: Սա շահարկումների պատճառ է դարձել այն մասին, որ ալ Հարիրիին, որը սուննի մուսուլման է եւ Էր ռիադի վաղեմի դաշնակիցը, սաուդներն են ստիպել հրաժարական տալ:
Մեկ այլ աղբյուր՝ լիբանանցի բարձրաստիճան քաղաքական գործիչ եւ Հարիրիի մտերիմ ընկերը նշել է, որ երբ նա Սաուդյան Արաբիա է մեկնել, «նրան խնդրել են մնալ այնտեղ եւ հրամայել են հրաժարական տալ: Նրանք հրամայել են կարդալ հրւաժարականի մասին հայտարարությունը, եւ մինչեւ հիմա նա տնային կալանքի մեջ է»:
Սաուդյան Արաբիան եւ Հարիրիի օգնականները հերքել են այն տեղեկությունները, թե նա տնային կալանքի մեջ է: Սակայն նա ինքը իր տեղաշարժի սահամանափակումը հերքող հայտարարություններ չի կատարել: Այս շաբաթ ավելի վաղ նա մեկօրյա այցով եղել էր ԱՄԷ-ում եւ Սաուդյան Արաբիա վերադարձել:
Լիբանանի նախագահ Միշել Աունը դիվանագիտական խողովակներով առաջ է ընթանում դեպի «Հարիրիի հրաժարականի հետ կապված գաղտնիքի բացահայտումը», հայտնում է լիբանանյան «Ալ Մանար» հեռուստաալիքը:
Սաուդյան Արաբիան պնդում է, որ Հարիրիի կոալիցիոն կառավարության մեջ ներառված «Հիբոլլահը» «գրավել» է Լիբանանի քաղաքական համակարգը:
Հարիրին իր հրաժարականի հայտարարության մեջ քննադատել էր Իրանին եւ «Հիզբոլլահին»՝ նշելով, որ նրանք արաբական երկրներում երկպառակություն են սերմանում, եւ որ ինքը վախենում է իր կյանքի համար: Լիբանանի նախկին վարչապետ եղած նրա հայրը զոհվել է 2005 թվականին ռումբի պայթյունի հետեւանքով:
«Լիբանանը շարժվում է այն ուղղությամբ, որ արտասահմանյան եւ արաբական երկրներին խնդրի ճնշում գործադրել սաուդացիների վրա վարչապետ Սաադ ալ Հարիրիին ազատագրելու համար»,- չներկայանալու պայմանով ասել է Լիբանանի կառավարության բարձրաստիճան պաշտոնյան:
«Էր Ռիադում Հարիրիին պահելը հարձակում է Լիբանանի ինքնիշխանության վրա: Մեր արժանապատվությունը նրա արժանապատվությունն է: Մենք (արտասահմանյան) երկրների հետ կաշխատենք նրան Բեյրութ վերադարձնելու համար»,- նշել է նա: