Նորվեգիայում ՆԱՏՕ-ի համատեղ ռազմական կենտրոնի հրամանատարությունը տարածել է նամակ, որում ներողություն է խնդրել Անկարայից այն բանից հետո , երբ վերջինը որոշել է հետ կանչել իր 40 զինծառայողներին Նորվեգիայում անցկացվող ՆԱՏՕ-ի զորավարժություներից։ Հետ կանչելու որոշումը պայմանավորված էր «հակառակորդներին» պատկերող լուսանկարների պաստառով, որոնց վրա Թուրքական Հանրապետության հիմնադիր Քեմալ Աթաթուրքն ու գործող նախագահ Ռեջեփ Թայիփ Էրդողանն էին պատկերված, հայտնում է NTV-ն։
Հեռուստաալիքը հայտնել է, որ նորվեգական բանակի զինծառայողը, որը Թուրքիայի նախագահին ներկայացրել է որպես ՆԱՏՕ-ի թշնամի, վտարվել է զինված ուժերից։
Հեռուստաալիքի տեղեկություններով՝ այդ միջադեպի համար Թուրքիայից ներողություն է խնդրել նաեւ ՆԱՏՕ-ի գլխավոր քարտուղար Ենս Սթոլթենբերգը։
Ավելի վաղ Էրդողանը հայտնել էր, որ զորավարժությունների կազմակերպիչները «թշնամիների» պատկերով պաստառ են տեղադրել, որտեղ պատկերված են նաեւ Աթաթուրքն ու Թուրքիայի գործող նախագահը։ Էրդողանի խոսքով ՝ Թուրքիայի գլխավոր շտաբի ղեկավարն անձամբ է հայտնել իրեն այդ մասին ու ասել, որ որոշել է հետ կանչել 40 թուրք զինվորների, որոնք մասնակցում են ՆԱՏՕ- ի զորավարժություններին։ Թուրքիայի ղեկավարությունը աջակցել է այդ որոշումը։
