«Յանդեքսի» մշակած Ալիսա վիրտուալ օգնականն առաջադրվել է ՌԴ նախագահի պաշտոնում, հայտնում է Lenta–ն։
Ալիսայի նախընտրական շտաբից հայտնել են, որ օգնականը մտադիր է ձեւավորել ապագայի քաղաքական համակարգ՝ կառուցված բացառապես ռացիոնալ որոշումների վրա, որոնք ընդունվում են հստակ ալգորիթմների հիման վրա։
Ալիսան ներկայացվում է որպես նախագահ, որն անձամբ է քեզ ճանաչում, քանի որ նրա հետ երկխոսություն կարող է ունենալ ցանկացած ռուսաստանցի։ Շտաբի հեղինակները նաեւ նշում են, որ շտաբում ընդգրկված են ձեռներեցներ, մարկետոլոգներ, ստեղծարար մասնագիտությունների ներկայացուցիչներ, սակայն կոնկրետ անձանց անուններ չեն նշվում։
Այս պահին Ալիսայի առաջադրման համար հավաքվել է մոտ 4 հազար ձայն։ Վիրտուալ թեկնածուի շտաբի ղեկավար Ռոման Զարիպովը հայտնել է, որ արհեստական ինտելեկտը չունի թույլ կողմեր, որոնք բնորոշ են մարդուն՝ իր բնազդների եւ հույզերի պատճառով։
Հիշեցնենք, որ ՌԴ նախագահական ընտրությունները կկայանան մարտի 18-ին, ընտրարշավը մեկնարկում է դեկտեմբերին։