ԱՄՆ պաշտպանության նախարարությունը մոտ ութ տարի առաջ սկսել է չբացահայտված թռչող օբյեկտների ուսումնասիրման ծրագիրն իրականացնել, որի մասին հաճախ հաղորդել են ռազմական օդաչուները: Այս մասին հաղորդում է «Politico» թերթը:
Ըստ օդաչուների նկարագրության` այդ օբյեկտներն իրենց հնարավորություններով գերազանցում էին ԱՄՆ եւ այլ երկրների զինանոցի ցանկացած օդային տեխնիկային: Ավելին, երբեմն այդ սարքերը «խախտում էին նույնիսկ ֆիզիկայի օրենքները»:
Այս նախաձեռնությունը կոչվում էր «Ավիացիայի համար առաջացած սպառնալիքների ընդլայնված ուսումնասիրման ծրագիր»: Այն գաղտնի չէր, թեեւ նրա գոյությունը հայտնի էր շատ սահմանափակ թվով մարդկանց:
Միեւնույն ժամանակ, ինչպես պնդում է ԱՄՆ Կոնգրեսի աշխատակազմի նախկին աշխատակիցներից մեկը Պենտագոնը խնդիր չի դրել գտնել այլմոլորակայինների գոյության ապացույցներ:
Նախեւառաջ, նրանք վախենում էին, որ թռչող սարքերը Ռուսաստանի կամ Չինաստանի վերջին ձեռքբերումներն են:
Ըստ Politico-ի՝ ծրագրի նախաձեռնողն այն ժամանակ ԱՄՆ Սենատում Դեմոկրատների խմբակցության ղեկավար Գերի Ռիդն էր, որին իր գործընկերների աջակցությամբ հաջողվեց 2009 թվականին բյուջեից միջոցներ ստանալ դրա համար: