Արցախում հակառակորդի կրակոցից զինվոր է զոհվել: Հունվարի 7-ին հակառակորդի արձակած կրակոցից մահացու վիրավորում է ստացել Պաշտպանության բանակի 19-ամյա զինծառայող Վաչե Չիլինգարյանը: Չիլինգարյանը Գեղարքունիքի մարզի Շողակաթ համայնքից էր, մեկ տարի առաջ էր զորակոչվել բանակ: Նա ընտանիքի միակ որդին էր, երկու կրտսեր քույր ունի:

Հայաստանի զինված ուժերի գլխավոր շտաբի պետի խոսքով՝ ժամկետային զինծառայողը ոչ մի խախտում թույլ չի տվել, նա զոհվել է դիպուկահարի կրակոցից: Նաեւ երկու վիրավոր կա. նրանք թեթեւ մարմնական վնասվածքներով զինհոսպիտալ են տեղափոխվել: Մովսես Հակոբյանը նշեց, որ հրամանատարը՝ ավագ լեյտենանտ Մուսինյանը, զինծառայողին օգնություն է գնացել, բայց վիրավորվել է: Մեկ այլ զինծառայող էլ վիրավորում է ստացել մեքենայում՝ դեպքի վայր շտապելիս կրակի տակ հայտնվելով:

Մեկնարկել է 2018 թվականի առաջին զորակոչը. այսօր ծառայության է մեկնել 167 նորակոչիկ: Ծնողները հուզմունքով են ճանապարհում որդիներին, իսկ նորակոչիկները բարձր տրամադրությամբ եւ մարտական ոգով են մեկնում ծառայության: Մեկնարկել է նաեւ «Ես եմ» ծրագիրը. Մովսես Հակոբյանի խոսքով՝ այս ծրագրով կամավոր հիմունքով ծառայության է մեկնելու 120 նորակոչիկ: «Ես եմ» ծրագրով զորակոչիկները իրավունք են ստանում անցնելու ծառայության նոր տեսակի` ժամկետային պայմանագրային: Այն կտեւի 3 տարի, որից, ընդհանուր առմամբ, 7 ամիս զինծառայողը կանցկացնի ազատ արձակման մեջ՝ մեկ շաբաթ` արձակուրդում, մեկ շաբաթ` զորամասում եւ երկու շաբաթ` առաջնագծում: Ծառայության ավարտին զինծառայողի անձնական հաշվին կփոխանցվի շուրջ 5 մլն դրամ, որը զորացրված զինծառայողը կկարողանա օգտագործել նպատակային երեք ծրագրերից մեկում՝ մատչելի բնակարան, մինի-ֆերմա կամ ուսման վարձի փոխհատուցում: 

Պաշտպանության փոխնախարար Արտակ Զաքարյանն էլ լրագրողների հետ զրույցում խոսել է զինծառայողների հանդերձանքի մասին: Ասում է՝ ամեն ինչ արվում է՝ մարտական հերթապահություն իրականացնող զինվորներին ավելի դիմացկուն եւ որակյալ համազգեստով ապահովելու համար: Պաշտպանության նախարար Վիգեն Սարգսյանն այս տարի հունվարի 6-ին՝ Սուրբ Ծննդյան տոնին Ջրօրհնեքի արարողության ժամանակ խաչքավոր էր: Համացանցում լուսանկարներ ու բազմաթիվ մեկնաբանություններ էին տարածվել: Արտակ Զաքարյանին լրագրողները նաեւ այս մասին են հարցրել: Պաշտոնյան նման մեկնաբանություններին պատասխանելն անիմաստ է համարել:

Աջակողմյան ղեկով մեքենաների ներկրումն ու վերահաշվառումն արգելելու մասին տրանսպորտի նախարարության ծրագրին արձագանքը նոր զարգացումներ է ստանում: Վարորդներն «Աջ ղեկ» նախաձեռնություն են սկսել եւ բողոքի ցույցեր են անցկացնում: Առաջինը երեկ էր. նախաձեռնության անդամներն ավտոերթ են անցկացրել, նաեւ պահանջել տրանսպորտի նախարար Վահան Մարտիրոսյանի հրաժարականը:

Այսօր էլ նրանք հավաքվել են կառավարության շենքի առջեւ ու վարչապետի հետ հանդիպում էին պահանջում: Սակայն Կարեն Կարապետյանը, պարզվում է, արձակուրդ է մեկնել: Նախաձեռնության անդամներն առաջարկությունների փաթեթ են մշակելու, որը հունվարի 12-ին ներկայացնելու են արձակուրդից վերադարձող վարչապետին:

Մինչ այդ, տրանսպորտի նախարարությունը հաղորդագրություն է տարածել՝ նշելով, որ նախագծում որոշ փոփոխություններ են արվել: Գերատեսչությունը որոշել է հարգել աջակողմյան ղեկով մեքենաների սեփականատերերի իրավունքը. ապրիլի 1-ից նման մեքենաների ներկրումը կարգելվի, բայց արդեն ներմուծված մեքենաների սեփականատերերը կկարողանան շահագործել, հաշվառել եւ վերահաշվառել իրենց մեքենաները: Ի դեպ, հունվարի 1-ից աջ ղեկով մեքենաների մասին նոր օրենք է գործում նաեւ հարեւան Վրաստանում: Այստեղ նման մեքենաների ներկրման եւ շահագործման հետ կապված խնդիրներ չեն ծագի, սակայն ղեկը ձախակողմյանի վերածելու հնարավորություն վարորդներն այլեւս չեն ունենա:

Երեւանում այսօր առավոտյան մահվան ելքով վթար է տեղի ունեցել: Աբովյան-Սայաթ-Նովա խաչմերուկում բախվել են «BMW X6»-ն ու ճանապարհային ոստիկանության «Toyota Corolla»-ն: Պատահարի հետեւանքով «Toyota»-ի վարորդ Արեգ Դավթյանը մահացել է, ոստիկանության մյուս ծառայող Խաչիկ Գասպարյանը հիվանդանոցում է: Նրա վիճակը ծայրահեղ ծանր է գնահատվում. ծանր աստիճանի գլխի սալջարդ, պարանոցի ողի կոտրվածք, թոքի վնասվածք, կոնքոսկրի եւ ազդրի կոտրվածք ունի: Մահացած եւ վիրավոր ոստիկանները ծառայության մեջ են եղել:

BMW-ի վարորդը դեպքի վայրից փախուստի է դիմել, սակայն ժամեր անց ներկայացել է ոստիկանություն: Ըստ տեղեկությունների՝ նա բազմաթիվ ավտովթարների հեղինակ, նախկինում դատապարտված «Ճվճվ Արոյի» որդին է՝ «Սաքուլիկ» մականունով հայտնի Սարգիս Վարդանյանն է: Ողբերգական պատահարի փաստով քրեական գործ է հարուցվել: Իսկ ոստիկանությունն ամփոփել է այս տարվա առաջին 8 օրերի օպերատիվ տվյալները: Դրանց համաձայն՝ 8 օրվա ընթացքում հանրապետությունում ճանապարհատրանսպորտային 61 պատահար է գրանցվել, որոնց հետեւանքով 9 մարդ զոհվել է, 98-ը տարբեր աստիճանի մարմնական վնասվածքներ է ստացել:

Դեկտեմբերի 28-ից Իրանի մի շարք քաղաքներում լարված իրավիճակ էր. այստեղ լայնածավալ բողոքի ակցիաներ էին: Թեհրանում, Սպահանում, Ռեշտում եւ այլ խոշոր քաղաքներում փողոցներ է դուրս եկել շուրջ 42 հազար մարդ: Ցույցերի ընթացքում նաեւ բախումներ են գրանցվել. անկարգությունների հետեւանքով 20 մարդ է զոհվել, այդ թվում՝ անչափահաս, միայն մայրաքաղաք Թեհրանում 450 ցուցարար է ձերբակալվել:

Հասան Ռոհանին հայտարարել է, որ բողոքի ակցիաները պայմանավորված են երկրի ներքին խնդիրներով. Իրանի նախագահը խոստացել է լուծել  տնտեսական խնդիրները, ջանքեր գործադրել՝ գործազրկության, գնաճի հարցերի լուծման համար: Այստեղ խոսում են նաեւ արտաքին սադրանքների մասին. Իրանի ազգային անվտանգության գերագույն խորհրդի քարտուղարը կարծիք է հայտնել, որ բողոքի ցույցերի հետեւում կանգնած են ԱՄՆ-ն, Մեծ Բրիտանիան ու Սաուդյան Արաբիան:

Իսկ երեկ լրատվամիջոցներում հրապարակումներ եղան նախկին նախագահ Մահմուդ Ահմադինեժադի ձերբակալության մասին, իբր՝ ցույցերը սատարելու համար: Նախկին նախագահի փաստաբանը, սակայն, հերքեց այս լուրերը:

Լոս Անջելեսում տեղի է ունեցել «Ոսկե Գլոբուս» մրցանակաբաշխության 75-րդ արարողությունը. այն կինոաշխարհում երկրորդ «Օսկար» են համարում: Աստղերի մեծ մասն այս տարի կարմիր գորգին ներկայացել է սեւ զգեստով՝ որպես բողոքի նշան Հոլիվուդում սեռական ոտնձգությունների դեմ: Հիշեցնենք, որ անցյալ տարի միանգամից մի քանի սեքս սկանդալ բռնկվեց, որոնց կենտրոնում հայտնվեցին պրոդյուսեր Հարվի Վայնշթեյնը, ինչպես նաեւ դերասաններ Քեւին Սփեյսին եւ Դասթին Հոֆմանը:

Ինչ վերաբերում է հաղթողներին. այս տարի «Լավագույն դերասան» անվանակարգում հաղթող է ճանաչվել Գարի Օլդմանը, լավագույն կանացի դերի համար «Ոսկե գլոբուս» է ստացել Ֆրենսիս Մաքդորմանդը, լավագույն ռեժիսոր է ճանաչվել Գիլյերմո դել Տորոն, իսկ ամերիկյան հայտնի հաղորդավարուհի Օփրա Ուինֆրին արժանացել է Սեսիլիա Բ. դե Միլլի անվան պատվավոր մրցանակի:

Հունվարի 8-ին դոլարը, եվրոն եւ ռուբլին թանկացել են: Դոլարի փոխարժեքը կազմել է 484 դրամ, եվրոյինը՝ 581, ռուբլունը՝ 8 դրամ 50 լումա, ֆունտինը՝ 656 դրամ:

Հունվարի 9-13-ը հանրապետությունում սպասվում է առանց տեղումների եղանակ: Օդի ջերմաստիճանը որոշ շրջաններում 5-6 աստիճանով կնվազի: Երեւանում նույնպես տեղումներ չեն սպասվում: Մայրաքաղաքում գիշերը կդիտվի -2-4 աստիճան ցուրտ, ցերեկը՝ +8+10 աստիճան տաքություն: