Հայաստանի Զինված ուժերի կառավարման ուղղահայացը փոփոխության է ենթարկվում. այսուհետ այն վարչապետ-անվտանգության խորհուրդ-կառավարություն-պաշտպանության նախարար-գլխավոր շտաբի պետ տեսքը: Զինված ուժերի ղեկավար կազմի հետ հանդիպման ժամանակ Սերժ Սարգսյանը հիշեցրել է, որ սա պայմանավորված է Սահմանադրության փոփոխություններով:

Նախագահը խոսել է բանակում կոռուպցիայի մասին: Սերժ Սարգսյանը դա դավաճանությանը հավասար հանցագործություն է համարում, չարիք՝ պետության եւ բանակի համար:

Սերժ Սարգսյանը նաեւ զինված ուժերում կարգապահությունն ամրապնդելու անհրաժեշտություն է տեսնում: Վստահեցնում է, որ բանակում միջադեպերի եւ դրանց հետեւանքով կորուստների մեծ մասը կանոնների խախտման արդյունք են: Իսկ այս ուղղությամբ աշխատանքում գերազանց արդյունքը նախագահը համարում է «զրո զոհ» ցուցանիշը: Ինչ վերաբերում է ղարաբաղյան հակամարտության կարգավորմանը. նախագահը ցավով է նշել, որ չի կարող բանակցություններում դրական առաջընթացի մասին խոսել:

Հանրապետականի եւ Դաշնակցության շարքերում ամիսներ շարունակ քննարկվում է վարչապետի պաշտոնում Սերժ Սարգսյանի թեկնածությունն առաջադրելու հարցը, բայց այդ քննարկումները դեռ կուսակցական-ինստիտուցիոնալ հարթակներ չեն հասել: Tert.am-ի հետ զրույցում այս մասին ասել է հանրապետության նախագահը՝ անդրադառնալով 2014 թվականի իր հայտարարությանը, թե այլեւս երբեք չի առաջադրվելու պետության ղեկավարի պաշտոնում: Ընդգծել է, որ այսօր էլ չի հավակնում վարչապետի պաշտոնին, բայց չի կարող «հաշվի չնստել իրականության հետ եւ համարել, որ պատասխանատվություն չունի մեր երկրի սահուն ընթացքի համար»: Սերժ Սարգսյանի խոսքով՝ բազմաթիվ գործընկերներ իր հետ նույնպես խոսել են այդ թեմայով, բայց չգիտի, թե երբ կավարտվեն այդ քննարկումները: Եթե ի վերջո որոշվի, որ առաջադրվելու է իր թեկնածությունը, կընդունի՝ մեկ հավելումով. պաշտոնավարմանը զուգահեռ ավելի շատ ժամանակ կհատկացնի երիտասարդ քաղաքական առաջնորդներին ամբողջ փորձը փոխանցելու գործին:

Ազգային ժողովի կողմից Հայաստանի 4-րդ նախագահ ընտրված Արմեն Սարգսյանի երդմնակալությունը կկայանա ապրիլի 9-ին, խորհրդարանի հատուկ նիստում: Ազգային ժողովի Խորհուրդն այսօր որոշել է, որ հատուկ նիստը կանցկացվի Մարզահամերգային համալիրում: Խորհրդարանական խմբակցություններից երդմնակալության արարողությանը կմասնակցեն Արմեն Սարգսյանի թեկնածությունն առաջադրած ՀՀԿ-ն եւ ՀՅԴ-ն: Այն բաց չի թողնի նաեւ «Ծառուկյան» խմբակցությունը, որի պատգամավորները նույնպես քվեարկել էին կոալիցիոն գործընկերների թեկնածուի օգտին: Իսկ «Ելք»-ն այս հարցով վերջնական որոշում դեռ չունի. միայն խմբակցության ղեկավար Նիկոլ Փաշինյանն է հայտարարել, որ չի պատրաստվում մասնակցել արարողությանը, քանի որ այն Ազգային ժողովում չի անցկացվելու:

Փետրվարի 13-ին քաղաքապետարանում տեղի ունեցած միջադեպից հետո Երեւանի ավագանու այսօրվա նիստը նույնպես թեժ մթնոլորտում է անցել: Այս անգամ նույնպես պատճառը «Երկիր Ծիրանին» էր, ավելի ճիշտ՝ խմբակցության ներկայացրած երկու նախագծերը: Խմբակցությունը, մասնավորապես, առաջարկում է Մարտի 1-ի զոհերի հիշատակին հուշարձան տեղադրել: Այս նախաձեռնությունը նույնպես «Երկիր Ծիրանիի» գործընկերների հավանությանը չի արժանացել: Հարցի քննարկումից առաջ «Ելք»-ից Ալեն Սիմոնյանն առաջարկել է մեկ րոպե լռությամբ հարգել Մարտի 1-ի զոհերի հիշատակը: Հանրապետականները ոտքի չեն կանգնել:

Հաջորդ հարցը վերաբերել է Երեւանի Վազգեն Սարգսյանի անվան փողոցը վերանվանելուն: «Երկիր Ծիրանին» առաջարկում է այն Վուդրո Վիլսոնին անունով կոչել: Սա զայրացրել է ավագանու մյուս խմբակցությունների անդամներին: Բանը նույնիսկ վիրավորանքների է հասել: Նշենք, որ երկու հարցերի քննարկման ժամանակ էլ «Ելք» խմբակցության անդամները նիստերի դահլիճում չեն եղել: Ավագանին Զարուհի Փոստանջյանի կուսակցության ներկայացրած երկու նախագծերն էլ մերժել է:

Հավելենք, որ ավագանու նիստից առաջ լրագրողները «Դռները բացեք, մամուլն է գալիս» կարգախոսով ակցիա էին կազմակերպել: Նրանք նաեւ նույն գրությամբ շապիկներով են եղել: Լրագրողները բողոքել են ավագանու նիստերին լրատվամիջոցների ներկայությունը սահմանափակելու՝ քաղաքապետարանի որոշման դեմ: Թեեւ այստեղ վստահեցնում են, որ ավագանու նիստերը դռնփակ չեն լինի, պարզապես լրագրողները դրանց կհետեւեն առանձին սրահից, լրատվամիջոցների ներկայացուցիչներին սա չի բավարարում:

Մարտի 18-ին Ռուսաստանում նախագահական ընտրություններ էին: Երկրի Կենտրոնական ընտրական հանձնաժողովն արդեն հաշվարկել է ընտրատեղամասերի կազմած արձանագրությունների 99.84%-ը: Նախնական արդյունքներով՝ 76.66% ձայնով նախագահ է վերընտրվել Վլադիմիր Պուտինը: Նախագահի պաշտոնին 8 թեկնածու էր հավակնում: Նրանցից երկրորդ տեղում Ռուսաստանի կոմունիստների թեկնածու Պավել Գրուդինինն է՝ 11.8% ձայնով, երրորդը Վլադիմիր Ժիրինովսկին է՝ 5.66% ձայնով: Քսենիա Սոբչակը ստացել է ընտրողների 1.67%-ը կողմ քվեն, Գրիգորի Յավլինսկին՝ 1.04%-ը, իսկ Բորիս Տիտովը, Մաքսիմ Սուրայկինն ու Սերգեյ Բաբուրինը 1%-ից էլ պակաս ձայն են ստացել: Ժիրինովսկու Լիբերալ-դեմոկրատական կուսակցությունն արդեն հայտարարել է, որ ընտրությունների արդյունքները վիճարկելու իմաստ չկա:

Ռուսաստանի նախագահ ընտրելու հնարավորություն են ունեցել նաեւ երկրի սահմաններից դուրս բնակվող ռուսաստանցիները. արտերկրում 400 ընտրատեղամաս է բացվել, այդ թվում երկուսը՝ Հայաստանում, Երեւանում եւ Գյումրիում: Երեւանում Ռուսաստանի դեսպանատան շենքում տեղակայված ընտրատեղամաս եկած նորապսակները գրավել են բոլորի ուշադրությունը. հարսանեկան խնջույքի մեկնելուց առաջ երիտասարդները որոշել էին անպայման կատարել իրենց քաղաքացիական պարտքը:

Թուրքիայի նախագահն ու զինված ուժերի Գլխավոր շտաբը հայտարարել են սիրիական Աֆրին քաղաքը վերահսկողության տակ վերցնելու մասին: Ի պատասխան՝ Աֆրինի քրդերը խոստացել են պարտիզանական պայքար մղել թուրքերի դեմ: Նրանք համոզված են, որ թուրքերի նպատակն Աֆրինի քրդերին ոչնչացնելն է, եւ հայտարարում են, որ չեն դադարեցնելու դիմակայությունը:

Իսկ սիրիական լրատվամիջոցները հաղորդում են Աֆրինի խաղաղ բնակչության դեմ թուրքական զորքերի հանցագործությունների մասին: Քաղաք ներխուժելու նախօրեին Թուրքիայի հրետանին եւ ավիացիան հրետակոծել էին այն, ինչի հետեւանքով մի քանի տասնյակ մարդ է զոհվել, հազարավոր բնակիչներ էլ լքել են իրենց տները: Արեւմտյան մամուլում լուսանկարներ են տարածվել, որոնցում պատկերված է թուրքական զորքերի եւ ահաբեկչական խմբավորումների զանգվածային թալանն Աֆրինի խանութներում եւ տներում: Աֆրինը պաշարվել էր մարտի կեսերից: Իսկ տեղի քրդական կազմավորումների դեմ Թուրքիան «Ձիթենու ճյուղ» գործողությունը սկսել էր հունվարի 20-ին: Թուրքական զորքերին աջակցում էին «Սիրիական ազատ բանակի» զինյալները՝ զինված խմբավորումների խոշորագույն միավորումը Սիրիայում, որը պայքարում է սիրիական կառավարության դեմ:

Երեւանի եւ Բրյուսելի միջեւ ուղիղ ավիահաղորդակցությունը վերականգնվում է. Brussels Airlines-ը վերսկսում է կանոնավոր չվերթները դեպի Հայաստան: Բելգիական ավիաընկերությունը քաղավիացիայի գլխավոր վարչությունից արդեն համապատասխան թույլտվություն է ստացել: Հունիսի 2-ից հուլիսի 2-ը, ինչպես նաեւ օգոստոսի 29-ից հոկտեմբերի 27-ը Բրյուսել-Երեւան-Բրյուսել չվերթները կիրականացվեն շաբաթական մեկ անգամ՝ յուրաքանչյուր շաբաթ, իսկ հուլիսի 3-ից օգոստոսի 28-ը՝ շաբաթական 2 անգամ՝ յուրաքանչյուր երեքշաբթի եւ շաբաթ:

Մարտի 19-ին դոլարն ու եվրոն շարունակել են արժեզրկվել, ընդ որում եվրոպական արժույթը՝ ավելի քան 2 դրամով: Դոլարի փոխարժեքը կազմել է 480 դրամ, եվրոյինը՝ 589, ռուբլունը՝ 8 դրամ 33 լումա, ֆունտինը՝ 671 դրամ:

Մարտի 20-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +8+10, ցերեկը՝ +20+22 աստիճան տաքություն: