Ռուսական «Ռոսսելխոսնադզոր»-ը հունիսի 14-ից արգելք է սահմանել Հայաստանից Ռուսաստան ներկրվող բոլոր տեսակի կենդանիների համար:
Գերատեսչությունը հայտնում է, որ ժամանակավոր սահմանափակումները կվերաբերվեն նաեւ սողուններին, թռչուններին, ամֆիբիաներին եւ հիդրոբիոնտներին, հաղորդում է «ՌԻԱ Նովոստի»-ն: Այս որոշումը կայացվել է՝ Ռուսաստանը «մարդկանց եւ կենդանիների համար ընդհանուր վտանգավոր հիվանդություններից» պաշտպանելու համար:
«Բացառություն են կազմում միայն տերերի կողմից անձնական օգտագործման համար տեղափոխվող շները, կատուները, ծովախոզուկները, կզաքիսները, ինչպես նաեւ թութակներն ու դեղձանիկները՝ երկուսից ոչ ավել թվաքանակով»,- հայտնել են «Ռոսսելխոսնադզոր»-ում: