նախընտրելի դարձնել
Բարձր տեխնոլոգիական հայկական ընկերությունները ոչ նախկին, ոչ էլ ներկայիս կառավարության ժամանակ բանակից պատվերներ չեն ստացել: Այս մասին «Նոյան Տապան» տեղեկատվական կենտրոնի «Քննարկում» հաղորդման եթերում հայտարարել է Ինֆորմացիոն տեխնոլոգիաների ձեռնարկությունների միության (UITE) գործադիր տնօրեն Կարեն Վարդանյանը:
Նրա խոսքով, Հայաստանի զինված ուժերը, չունենալով բարձր տեխնոլոգիական զենքեր, չեն օգտագործում հայ ինժեներների պատրաստի աշխատանքները, մինչդեռ այդ ոլորտում երկիրը մեծ ներուժ ունի:
«Այդ իմաստով ես տարբերություն չեմ տեսնում ներկայիս եւ նախկին իշխանությունների միջեւ, բայց հույս ունեմ, որ 2-3 ամսից իրավիճակը կփոխվի եւ մենք չենք ապավինի միայն Ռուսաստանի օգնությանը»,- նշել է Կարեն Վարդանյանը:
Մինչ այդ, շարունակել է նա, 2016-ի ապրիլյան պատերազմը ցույց տվեց, որ ապագա պատերազմները բարձր տեխնոլոգիական կլինեն եւ այդ ոլորտի մասնագետները պետք է իշխանությունների վրա ճնշում գործադրելու ճանապարհով զինված ուժերում ժամանակակից զենքերն առաջ տանեն:
«Չպետք է թույլ տալ, որ բյուրոկրատական կառույցները որոշեն պետք է ողջ մնաս թե ոչ»,- նշել է նա:
