Լեռնային Ղարաբաղում ողջունում են Դուշանբեում Հայաստանի վարչապետի եւ Ադրբեջանի նախագահ Իլհամ Ալիեւի զրույցի հուսադրող արդյունքները, սակայն կոչ են անում չմոռանալ, թե ում հետ գործ ունենք: Այս մասին հայտարարեց Արցախի նախագահի մամուլի քարտուղար Դավիթ Բաբայանը՝ NEWS.am-ի խնդրանքով մեկնաբանելով Լեռնային Ղարաբաղի հակամարտության կարգավորման շուրջ վերջին զարգացումները:
«Այն ինչ կատարվում է վերջին շրջանում, ցույց է տալիս Ադրբեջանի եւ նրա ղեկավարության էությունը: Մի կողմից հնչում են լարվածության նվազեցման մասին ընդունելի հայտարարություններ, գործնականում «Ղարաբաղը վերադարձնելու» պահանջով հանրահավաքներ են անցկացվում, դրան զուգահեռ առաջին փոխնախագահ եւ առաջին տիկին Մեհրիբան Ալիեւան սադրիչ հայտարարություններ է անում: Դրանք նշանային իրադարձություններ են, քանի որ իրականությունն այն է, որ Ադրբեջանի նպատակը հայկական պետականության ոչնչացումն է՝ ինչպես Հայաստանում, այնպես էլ Արցախում», - ընդգծեց Բաբայանը:
Ըստ նրա, ընդհանուր առմամբ, ներկայումս շփման գծում իրավիճակը համեմատաբար հանգիստ է, համապատասխանում է վերջին տարիների միջին ցուցանիշներին: «Բայց մշտապես պետք է զգոն մնալ: Եվ հիշել, ում հետ գործ ունենք: Ադրբեջանը չի կատարում ոչ միայն բանավոր պայմանավորվածությունները, այլեւ գրավոր համաձայնագրերն է հրաժարվում կատարել:
Այն նաեւ խախտում է ՄՀԻ-ն, ՄԱԿ-ի կանոնադրությունը, սեփական Սահմանադրությունը եւ օրենսդրությունը: 2016-ի ապրիլյան պատերազմը դրա վառ օրինակն է: Հետեւաբար, միշտ պետք է հիշել, որ ի դեմս Ադրբեջանի մենք ահաբեկչական պետություն հետ գործ ունենք», - եզրափակեց Դավիթ Բաբայանը:
Հիշեցնենք, որ Դուշանբեում ԱՊՀ երկրների ղեկավարների հանդիպման շրջանակներում Նիկոլ Փաշինյանի եւ Իլհամ Ալիեւի միջեւ կարճ երկխոսություն տեղի ունեցավ: Բաքվում, մինչ այդ անցկացվել էր «Ղարաբաղը վերադարձնելու» պահանջով հանրահավաք:
