Միայն կարող եմ ձեզ տեղեկացնել, որ քննարկվում է Ազգային ժողովին ինքնալուծարման իրավունք տալու գաղափարը: Այս մասին հունվարի 26-ին Ազգային ժողովում լրագրողների հետ զրույցում ասաց իշխող «Իմ քայլը» դաշինքի պատգամավոր Վահագն Հովակիմյանը:
Նրա խոսքով` իշխող «Իմ քայլը» դաշինքի խորհրդարանական խմբակցությունում այս հարցը դեռ չի քննարկվել: «Այս հարցի վերաբերյալ մենք դեռ որոշում չունենք: Չի բացառվում, որ մենք քննարկենք այս հարցը մեր խմբակցության շրջանակներում եւ բացասական եզրակացություն տանք»,- նշեց Հովակիմյանը:
Ճշտող հարցին` արդյո՞ք այդ նախաձեռնությունը, այնուամենայնիվ, իշխող մեծամասնությանն է, պատգամավորը կարճատեւ դադարից հետո պատասխանեց. «Այո»:
Ի պատասխան եվս մի հստակեցնող հարցի այն մասին, թե ինչո՞ւ են իրենց մոտ նման գաղափար ծագել, պատգամավորը մի փոքր տարօրինակ կերպով պատասխանեց, որ այս տեսակի նախաձեռնությունը «հայկական» չէ: Ըստ նրա` այս հարցը քննարկվել է դեռ Սահմանադրության մեջ փոփոխություններ կատարելու շրջանում: «Անձամբ ես ինքս ինձ համար այս հարցը դիտարկել եմ»,- նշեց խորհրդարանականը` այս նախաձեռնության վերաբերյալ մանրամասներ չհաղորդելով, քանի որ որոշում դեռ չկա:
Լրագրողները նկատեցին, որ քաղաքացիների մոտ կարող է տպավորություն ստեղծվել, որ իշխող դաշինքը վարչապետ Նիկոլ Փաշինյանի` հրաժարական տալ հրաժարվելու պատճառով չգիտի` ինչպես ցրել խորհրդարանը եւ այդ պատճառով փորձում է հարցի լուծման այլընտրանքային ուղիներ գտնել: , «Կարող եմ ասել, որ դա միայն ձեր տպավորությունն է: Մյուսները եւս կարող են նման տպավորություն ունենալ, սակայն դա ոչ մի աղերս չունի իրականության հետ»,- մերկախոս հավաստիացրեց Վահագն Հովակիմյանը: