Մենք անում ենք ամեն ինչ, որպեսզի մեր կողմից ստեղծվող քաղաքական կուսակցությունն իր թեկնածուի հետ մասնակցի ընտրություններին: Այս մասին լրագրողների հետ հանդիպմանն ասաց «Թովմասյան» բարեգործական հիմնադրամի հիմնադիր Արտակ Թովմասյանը:
Նա պարզաբանեց, որ ինքը չի հավակնում վարչապետի պաշտոնին, քանի որ միշտ հնարավորություն է ունեցել զբաղվել քաղաքականությամբ Ռուսաստանում կամ Ուկրաինայում, սակայն չի ցանկացել: «Սակայն եթե նման անհրաժեշտություն լինի, ես դա չեմ բացառում: Այժմ մենք ակտիվ քննարկումներ ենք անցկացնում եւ ցանկանում ենք մեր շարքերում տեսնել իրենց ոլորտներում կայացած մարդկանց»,-նշեց նա:
Թովմասյանի կարծիքով՝ իշխանություն պետք է լինեն ստեղծագործ մարդիկ, որոնք բարենպաստ պայմաններ են ստեղծում հանրության համար, այսինքն՝ ձեւավորում են տեխնոկրատ կառավարություն, որտեղ մարդկանց կուսակցական նախընտրությունները դեր չունեն: «Մենք կգործենք բացարձակ անկախ, այդ թվում՝ 17 կուսակցություններից անկախ: Ամեն դեպքում, այսօր չկա որոշում՝ միանալու Հայրենիքի փրկության շարժմանը, չնայած նրան, որ նման առաջարկ եղել է: Դա կապված է նրա հետ, որ հանրության մի մասը նրանց մեջ տեսնում է «նախկինների»: Մենք ցանկանում ենք դառնալ հանրությունը միավորող քաղաքական կուսակցություն: Մեր միակ նմանությունը գործող իշխանության հրաժարականի պահանջն է: Ինչ վերաբերում է Վազգեն Մանուկյանին, նա անկախ, կշռադատված մարդ է եւ արժանի թեկնածու: Մենք կգործենք բացառապես օրենքի շրջանակում, կապացուցենք մեր արժեքը ոչ թե փողոցի, այլ գործի միջոցով»,-նշեց հիմնադրամի հիմնադիրը:
Նա գործող իշխանությանը կոչ արեց գիտակցաբար հրաժարական տալ եւ ձեւավորել ժամանակավոր կառավարություն: «Պարտված եւ բոլոր ոլորտները ձախողած իշխանությունը չի կարող մնալ: Դա մեր ժողովրդի, այդ թվում սփյուռքի արժանապատվության հարցն է: Ինչպե՞ս կարելի է ասել, որ հայ ժողովուրդը փախուստի է դիմել մարտի դաշտից: Անձամբ իմ որդին կամավորագրվել է, եւ ինձ համար դրանք անընդունելի հայտարարություններ են: Պետք է վերականգնել հանրության միասնականությունը»,-եզրափակեց Թովմասյանը: