2014-2017 թվականներին սեռական բռնության է ենթարկվել 59.284 երեխա, գրել է BirGün թերթը՝ վկայակոչելով Թուրքիայի վիճակագրական ինստիտուտի (TÜİK) հետազոտությունը։

Բռնության ենթարկված երեխաների ճնշող մեծամասնությունը աղջիկներ են եղել, սակայն հաշվարկում եղել է նաեւ 7.466 տղա։

Մարդու իրավունքների ասոցիացիայի (İHD) Ստամբուլի մասնաճյուղի զեկույցի համաձայն՝ վերջին 16 տարիների ընթացքում 18 տարեկանից ցածր մոտ 440 հազար աղջիկ երեխա է լույս աշխարհ բերել։ Անչափահասների նկատմամբ բոլոր սեռական հանցագործությունների 46 տոկոսը կատարվել է նույն ժամանակահատվածում։

Թուրքիայի հարավում գտնվող Մերսինի համալսարանի դատական ​​բժշկության ամբիոնի հիվանդանոցներից մեկում հետազոտվել է երեխաների սեռական բռնության 1.360 դեպք, իր ուսումնասիրության մեջ պարզել է դոկտոր Էբրու Յաշաթ Աքսայը։ Բռնության ենթարկված երեխաների 81 տոկոսը աղջիկներ են եղել, մինչդեռ զոհերի միջին տարիքը եղել է 13 տարեկան։ Բռնություններն առավել հաճախ տեղի են ունեցել տնային պայմաններում, ընդ որում երեխաների 63.5 տոկոսը սեռական բռնության է ենթարկվել տանը:

Դաժան վերաբերմունքի մակարդակն աճել է ամռան ամիսներին՝ կապված դպրոցների փակման, զբոսաշրջության ավելացման եւ սեզոնային գյուղատնտեսական աշխատանքներով պայմանավորված միգրացիայի հետ:

Դեպքերի ավելի քան 40 տոկոսը գրանցվել է դրանցից մեկ ամիս ավելի ուշ: Ինցեստի 253 դեպքերից հանցագործների 25 տոկոսը եղել են կենսաբանական հայրեր, եւս 12 տոկոսը՝ տուժած երեխաների խորթ հայրերը: Հանցագործների 61 տոկոսը կազմել են հեռավոր տղամարդ ազգականները։

Բոլոր դեպքերի 84 տոկոսում հանցագործները ճանաչել են իրենց զոհերին, իսկ մոտ 10 տոկոսը զոհերին հանդիպել է համացանցի միջոցով:

Երեխաների 52 տոկոսը հետագայում ցույց է տալիս հետտրավմատիկ սթրեսային խանգարման նշաններ:

«Սա այսբերգի գագաթն է», - ասել է Աքսայը: «Այս թվերը վերցված են մեկ հիվանդանոցից եւ քրեական ստորաբաժանում հասած դեպքերից։

Աքսայի խոսքերով՝ շատ երեխաներ չեն գիտակցում, որ իրենց նկատմամբ վատ են վարվում, իսկ շատերը լռում են վախի եւ ծաղրի պատճառով։