Թուրքիայի արտգործնախարար Մեւլութ Չավուշօղլուն հայտարարել է, որ ռուսական կողմն առաջարկել է հետաձգել Թուրքիայի, Ռուսաստանի, Իրանի եւ Սիրիայի պատվիրակությունների հանդիպումը Մոսկվայում, հաղորդում է Ahaber հեռուստաալիքը։
«Ռուսական կողմը մեզ տեղեկացրեց, որ չի ավարտել նախապատրաստական աշխատանքները եւ առաջարկեց հետաձգել։ Առաջարկվեց ժամկետը հետաձգել, մենք համաձայնեցինք»,- պարզաբանել է Չավուշօղլուն։
Նրա խոսքով՝ Անկարան ընդունել է հանդիպումը հետաձգելու առաջարկը, սակայն նախարարը չի բացառել, որ հանդիպումը հետաձգվել է Սիրիայի խնդրանքով։
Մոսկվայում պետք է կայանար Իրանի, Ռուսաստանի, Սիրիայի եւ Թուրքիայի փոխարտգործնախարարների հանդիպումը։ Դրա շրջանակներում կողմերը պետք է քննարկեին Անկարայի եւ Դամասկոսի միջեւ հարաբերությունների կարգավորման վերաբերյալ նախարարական հանդիպման նախապատրաստումը։
