Կանադայի վարչապետ Ջասթին Թրյուդոն և նրա կինը՝ Սոֆին, հայտարարել են, որ բաժանվում են 18 տարվա համատեղ կյանքից հետո։
«Ես և Սոֆին ցանկանում ենք հայտարարել, որ շատ բազմանշանակ և դժվար խոսակցություններից հետո մենք որոշում ենք կայացրել բաժանվել»,- գրել է Թրյուդոն Թվիթերում։
«Ինչպես միշտ, մենք մնում ենք հարազատ մարդիկ՝ կապված միմյանց հանդեպ սիրով ու հարգանքով, այն ամենի հանդեպ, ինչ կառուցել և շարունակելու ենք կառուցել միասին»,- գրել է 51-ամյա վարչապետը։
Նրա գրասենյակը հայտնել է, որ զույգը պաշտոնապես ստորագրել է առանձին ապրելու համաձայնագիր: «Նրանք հոգացել են, որ իրենց որոշման առնչությամբ ձեռնարկվեն բոլոր անհրաժեշտ իրավական և էթիկական քայլերը և դա կշարունակեն անել ապագայում», - հայտնել է վարչապետի մամուլի գրասենյակը։
Կանադայում առանձին ապրելու համաձայնագիրը պաշտոնական ամուսնալուծություն չէ, որը հաստատում է դատարանը, այլ ամուսինների՝ բաժանվելու իրավաբանորեն ձեւակերպված որոշումը։ Առանձին ապրելը ժամանակ է տալիս կարգավորելու, եթե ոչ զույգի հարաբերությունները, ապա գոնե ամուսնալուծության ֆինանսական կողմի և երեխաների խնամակալության հետ կապված հարցերը։ Մեկ տարով բաժանումը կարող է վերջնական ամուսնալուծության հիմք հանդիսանալ։
«Հանուն մեր երեխաների բարեկեցության խնդրում ենք հարգել մեր և նրանց անձնական կյանքը»,- խնդրել է վարչապետը։
