Գերմանիայի բնակիչների միայն 23%-ն է կարծում, որ կանցլեր Ֆրիդրիխ Մերցի ղեկավարած իշխող կոալիցիան կպահպանի իշխանությունը մինչև հաջորդ խորհրդարանական ընտրությունները, որոնք նախատեսված են 2029 թվականի սկզբին։ Միևնույն ժամանակ հարցվածների 57%-ն ակնկալում է, որ կառավարությունը վաղաժամ կփլուզվի։ Այդ մասին են վկայում YouGov-ի հարցման արդյունքները, որն անցկացվել է dpa գործակալության պատվերով։

Հետազոտության համաձայն, հարցվածների 13%-ը կանխատեսում է կոալիցիայի փլուզումը մինչև 2026 թվականի վերջը, իսկ ևս 44%-ը՝ 2027 կամ 2028 թվականին։ Հարցման մասնակիցների 20%-ը դժվարացել է պատասխանել։

Հոռետեսությունը գերակշռում է նաև հենց իշխող կուսակցությունների կողմնակիցների շրջանում։ CDU/CSU պահպանողական դաշինքի ընտրողների շրջանում կառավարության վաղաժամ փլուզում է ակնկալում 53%-ը, մինչդեռ կոալիցիայի պահպանմանը մինչև 2029 թվականը հավատում է 32%-ը։ Գերմանիայի սոցիալ-դեմոկրատական կուսակցության (SPD) կողմնակիցների շրջանում նման հոռետեսների թիվը 46% է, իսկ կոալիցիայի լիարժեք պաշտոնավարման ժամկետին հավատում է 34%-ը։

Մերցի կառավարությունը սեպտեմբերին տեղի ունեցած տարածաշրջանային ընտրություններից հետո ապրում է ձգձգվող ճգնաժամ, որոնցում CDU/CSU-ն և SPD-ն լուրջ կորուստներ կրեցին, իսկ ծայրահեղ աջ «Այլընտրանք Գերմանիայի համար» (AfD) կուսակցությունը պատմական հաջողությունների հասավ։ Տնտեսական և սոցիալական բարեփոխումների շուրջ տարաձայնությունները, ինչպես նաև AfD-ի և Ձախ կուսակցության ժողովրդականության աճը լրացուցիչ սրել են կոալիցիոն գործընկերների միջև հարաբերությունները։

Սակայն CDU-ի գլխավոր քարտուղար Ֆրանցիսկա Հոփերմանը մերժել է կառավարության վաղաժամ փլուզման հավանականությունը։ Մյունխենյան Abendzeitung թերթին տված հարցազրույցում նա հայտարարել է, որ կոալիցիայի բոլոր մասնակիցները գիտակցում են իրենց պատասխանատվությունը։

Կաբինետի գլխավոր խնդիրների թվում Հոփերմանը նշել է սոցիալական ապահովության համակարգի բարեփոխումը, պետական ֆինանսների կայունացումը և անվտանգության խնդիրների լուծումը։ Նա նաև դրական ազդանշան է համարել Գերմանիայի տնտեսական աճի կանխատեսման վերանայումը դեպի բարձրացում։

«Այն, ինչ մենք անում ենք, արդյունք է տալիս», — հայտարարել է CDU-ի ներկայացուցիչը։

Հարցումն անցկացվել է հոկտեմբերի 16-ից 19-ը՝ Գերմանիայի 2202 չափահաս բնակիչների շրջանում։