նախընտրելի դարձնել
Հռոմի պապ Լևոն XIV-ը կոչ է արել դադարեցնել ռազմական գործողությունները Եմենում, ցավակցություն է հայտնել Հորդանանում ուղղափառ եկեղեցու վրա հարձակման զոհերի կապակցությամբ և կոչ է արել աշխարհի կրոններին միավորվել հանուն խաղաղության։ Այդ մասին քահանայապետը հայտարարել է հոկտեմբերի 25-ին՝ կիրակնօրյա «Հրեշտակ Տեառն» աղոթքից հետո, գրում է Vatican News-ը։
Կաթոլիկ եկեղեցու ղեկավարը հատուկ ուշադրություն է դարձրել Եմենի Թաիզ քաղաքում տիրող հումանիտար ճգնաժամին, որի բնակիչները զգում են սննդամթերքի, ջրի և բժշկական օգնության պակաս։
«Ամբողջ սրտով կոչ եմ անում դադարեցնել ռազմական գործողությունները և ապահովել Եմենի ժողովրդին, ինչպես նաև տարածաշրջանի բոլոր ժողովուրդներին, խաղաղության մեջ ապրելու հնարավորություն», — հայտարարել է Լևոն XIV-ը։
Ռազմական գործողությունների և ճանապարհների փակման պատճառով Թաիզում խաթարվել են կենսական նշանակության ապրանքների մատակարարումները։ Հիվանդանոցները բախվում են դեղերի և թթվածնի պակասի, իսկ հասարակական խոհանոցները դժվարանում են սնունդով ապահովել առավել խոցելի ընտանիքներին։
Քահանայապետը նաև աղոթել է Հորդանանի Քարաք նահանգում Սուրբ Գևորգի հունական ուղղափառ եկեղեցու ծխականների վրա հարձակման հետևանքով զոհվածների և տուժածների համար։ Vatican News-ի ներկայացրած տվյալներով, հոկտեմբերի 23-ին հուղարկավորության ժամանակ տեղի ունեցած հրաձգության հետևանքով զոհվել է ինը մարդ, շուրջ 40-ը ստացել են վիրավորումներ։
«Ես հոգեպես այս համայնքի և ամբողջ երկրի կողքին եմ, որն առանձնանում է խաղաղ համակեցությամբ և տարբեր կրոնների ներկայացուցիչների միջև հարգանքով», — ասել է պապը։
Բացի այդ, Լևոն XIV-ը կոչ է արել հավատացյալներին աղոթել խաղաղության համար հոկտեմբերի 27-ին Իտալիայի Ասիզի քաղաքում կայանալիք քրիստոնյա և այլ կրոնական առաջնորդների հանդիպման նախօրեին։ Այն նվիրված է 1986 թվականին Հովհաննես Պողոս II պապի կազմակերպած միջկրոնական աղոթքի հանդիպման 40-ամյակին։
«Երբևէ այսքան ակնհայտ չի եղել, որ պատերազմները, բացի մարդկային զոհերից և ավերածություններից, աղքատացնում և վնասում են ամբողջ աշխարհին», — ընդգծել է քահանայապետը։ Նա հույս է հայտնել, որ Տերը մարդկանց կներշնչի ընտրել երկխոսությունն ու խաղաղությունը։
