նախընտրելի դարձնել
Միացյալ Նահանգները կորցրել է մինչև 2,8 միլիարդ դոլարի ավիացիոն տեխնիկա, վկայում են ամերիկյան վերլուծական կենտրոնի տվյալները, հաղորդել է Al Jazeera-ն։
Մարտի 26-ին կառավարության՝ հեռուստատեսությամբ հեռարձակվող նիստում ելույթ ունենալով՝ ԱՄՆ պաշտպանության նախարարը պարծեցել է Իրանի դեմ շարունակվող պատերազմում երկրի ռազմական հաջողություններով։ «Պատմության մեջ երբեք որևէ երկրի բանակ այսքան արագ և արդյունավետ չի վնասազերծվել», - հայտնել է նա՝ նստած ԱՄՆ նախագահ Դոնալդ Թրամփի կողքին։
Արդեն հաջորդ օրը Իրանն արձակել է հրթիռներ և անօդաչու սարքեր, որոնք հարվածել են Սաուդյան Արաբիայում գտնվող ամերիկյան ռազմաբազային՝ վիրավորելով մի քանի ամերիկացի զինծառայողների և ոչնչացնելով 700 միլիոն դոլար արժողությամբ ռադիոլոկացիոն հսկողության ինքնաթիռ։
Սա եզակի դեպք չէ։ Իրանի հրթիռները և անօդաչուները, ինչպես նաև այսպես կոչված «բարեկամական կրակի» մեկ կործանարար դեպք, ոչնչացրել են 2,3-2,8 միլիարդ դոլար արժողությամբ ամերիկյան ռազմական տեխնիկա, հաշվարկել է Վաշինգտոնում գտնվող Ռազմավարական և միջազգային ուսումնասիրությունների կենտրոնը (CSIS)։
CSIS-ի գնահատականն այս պատերազմում ԱՄՆ կորուստների առաջին մանրամասն հաշվարկն է, որն իրականացրել է խոշոր միջազգային հետազոտական կազմակերպությունը։ Պատերազմը սկսվել է փետրվարի 28-ին, Al Jazeera-ն առաջինն է հայտնել այդ մասին։
Գնահատականը չի ներառում տարածաշրջանում ամերիկյան բազաների, ինչպես նաև մասնագիտացված սարքավորումների կամ ռազմածովային միջոցների կորուստները։
Հաշվարկներն իրականացրել է CSIS-ի պաշտպանության և անվտանգության բաժնի ավագ խորհրդական Մարկ Կանցիանը։ Նա նշել է, որ ուսումնասիրում է նաև Պարսից ծոցում ԱՄՆ բազաներին հասցված վնասը, սակայն դա ավելի բարդ է եղել։ Արբանյակային նկարներ տրամադրող Planet Labs ընկերությունը ԱՄՆ կառավարության պահանջով փետրվարի 28-ից արգելափակել է պատկերների հասանելիությունը հանրության և ԶԼՄ-ների համար։ Միևնույն ժամանակ, իրանական արբանյակային պատկերները մնում են հասանելի։
«Վերևից արված նկարներով կարելի է տեսնել, թե որ շենքերն են խոցվել», - ասել է Կանցիանը ԱՄՆ բազաների մասին։ «Բայց դժվար է հասկանալ, թե ինչ է գտնվել այդ շենքերի ներսում»։
Կորուստների մի մասը «բարեկամական կրակի» հետևանք է եղել։ Նման միջադեպերից մեկում մարտի սկզբին Քուվեյթում խոցվել են երեք F-15 կործանիչներ։
Սակայն պատերազմում ոչնչացված ամերիկյան ինքնաթիռների և ռադիոլոկացիոն համակարգերի մեծ մասը խոցվել է Իրանի կողմից։ Հատկապես առանձնանում է երկու դեպք։
Մարտի 1-ին ԱՄՆ-ը կորցրել է առնվազն մեկ հզոր հակահրթիռային պաշտպանության ռադիոլոկացիոն կայան, որն օգտագործվում է THAAD համակարգի կողմից հրթիռներ և որոշ հիպերձայնային սպառնալիքներ հայտնաբերելու, ինչպես նաև մյուս պաշտպանական համակարգերին ուղղորդման տվյալներ փոխանցելու համար։ Որոշ տվյալներով՝ ոչնչացվել են նման երկու ՌԼԿ-ներ։ Կորուստների ընդհանուր արժեքը կազմել է 485 միլիոնից մինչև 970 միլիոն դոլար։ Ճշգրիտ վայրը չի հստակեցվում։ ԱՄՆ զինված ուժերը տեղակայված են Պարսից ծոցի մի քանի երկրներում, որտեղ կան THAAD համակարգեր։
