Ադրբեջանի նախագահ Իլհամ Ալիևը մանիպուլյացիայի, լկտիության և ստի «փայլուն դաս» տվեց այսօր։

Դասն այսօր տրվեց գործնականում ողջ Եվրոպայի էլիտային։ Հիշեցնենք, որ Ադրբեջանի նախագահը Եվրոպական խորհրդի նախագահ Անտոնիու Կոշտայի հետ համաձայնեցմամբ, այլ ոչ թե գագաթնաժողովն ընդունող կողմի հետ (առնվազն Ալիևը նշել է հենց Կոշտային), տեսաուղերձ է հղել Երևանում անցկացվող Եվրոպական քաղաքական համայնքի գագաթնաժողովի մասնակիցներին։

Թե ընդհանրապես ինչ առնչություն ունի Ադրբեջանը Եվրոպական քաղաքական համայնքի հետ, առանձին հարց է։ Հետաքրքիրն այն է, թե ինչպիսի լկտիությամբ է Ալիևը Եվրոպային թելադրում իր  օրակարգը և ինչպիսի հաճույքով է Եվրոպան այն ընդունում։

Կարճ ասած՝ Ալիևի ուղերձը հանգում էր սեփական ձեռքբերումների թվարկմանը՝ «տարածքային ամբողջականության վերականգնում, անջատողականության դադարեցում, ռազմական հանցագործներին պատասխանատվության ենթարկում», ինչպես նաև հարձակումների՝ Եվրախորհրդարանի և ԵԽԽՎ-ի հասցեին։ Ալիևին առարկել համարձակվեց միայն Եվրոպական խորհրդարանի ղեկավար Ռոբերտա Մեցոլան։ «Խաղաղարարի» կերպարը ամրապնդելու համար Ալիևը հայտարարեց Հայաստանի հետ խաղաղության հաստատման, առևտրային հարաբերությունների և տարանցման մեկնարկի մասին, իսկ վերջում հաստատեց Բաքվի խաղաղ օրակարգը։

Թե հատկապես ինչ խաղաղ օրակարգ նկատի ունեն Բաքվում, պարզաբանում է Ադրբեջանի նախագահի պաշտոնական էջում հրապարակված նյութը։ Պարզվում է՝ նույնիսկ այս մակարդակում Ադրբեջանում ի վիճակի չեն հարգել ընդդիմախոսներին։ Ադրբեջանի առաջնորդի պաշտոնական էջում Երևանը նշված է որպես «Իրևան»։ Տեղի ունեցողին առանձնահատուկ իմաստ է հաղորդում այն հանգամանքը, որ, չնայած «հաստատված խաղաղությանը», Ադրբեջանը հայկական կողմի համար փակ է պահում բոլոր պաշտոնական կայքերը, և դրանք հնարավոր է դիտել միայն VPN-ի օգնությամբ։

Ահա այսպես՝ Ալիևն առանց ամաչելու շարունակում է հայատյաց քաղաքականությունը։