Նախընտրելի
Դուջուան թայֆունի առաջացրած առատ տեղումները հարվածել են Տոկիոյին և Ճապոնիայի հարակից շրջաններին, ինչից հետո առաջացրել են սողանքներ ու ջրհեղեղներ․ կա 6 զոհ, ևս 6 մարդ համարվում է անհետ կորած։ Այս մասին հայտնում է Kyodo-ն։
Երբ թայֆունն անցնում էր երկրի խաղաղօվկիանոսյան ափամերձ հատվածով, տեղատարափ ապառատները ջրասույզ են արել Տիբա պրեֆեկտուրայի տները և շուրջ 58 հազար տնային տնտեսություն ժամանակավորապես զրկել էլեկտրամատակարարումից։
Տիբայում հինգ մարդ է զոհվել․ նրանց թվում է 51-ամյա մի տղամարդ, որը մասնակցել է ճանապարհի վերականգնման աշխատանքներին։ Մյուս զոհերը 70-ից 80 տարեկան անձինք են եղել։
Առատ տեղումները հատկապես ծանր հարված են հասցրել Տիբային, որն արդեն տուժել էր օգոստոսին և սեպտեմբերի սկզբին տեղացած տեղատարափ անձրևներից։ Այս անգամ աղետը տեղի է ունեցել պրեֆեկտուրայում՝ «Արծաթե շաբաթ» տոնական շաբաթվա ամենաթեժ շրջանում, երբ Ճապոնիայի բազմաթիվ բնակիչներ ճանապարհորդում են երկրով մեկ։
Տոկիոյին սահմանակից Կանագավա պրեֆեկտուրայի Յոկոսուկա և Միուրա քաղաքներում մի շարք սողանքներ են գրանցվել․ մեկ մարդ զոհվել է, ևս չորսը համարվում են անհետ կորած։ Ոստիկանությունը շարունակում է նրանց որոնողական աշխատանքները։
Իշխանությունները զգուշացնում են տուժած շրջաններում նոր սողանքների ու ջրհեղեղների վտանգի մասին, քանի որ առատ տեղումների հետևանքները կարող են պահպանվել անգամ թայֆունի հեռանալուց հետո։
