Իրանում հայրենական սպառազինության և ռազմական տեխնիկայի արտադրության ծավալը 2,5 անգամ աճել է՝ 40-օրյա պատերազմից առաջ եղած ժամանակահատվածի համեմատ, հայտարարել է երկրի Պաշտպանության նախարարության պաշտոնական ներկայացուցիչ, բրիգադի գեներալ Ռեզա Թալաեյնիկը, հաղորդում է Mehr-ը։

«Երեք ամիս առաջ մենք հայտարարեցինք, որ հայրենական սպառազինության և սարքավորումների արտադրության ծավալը մոտավորապես երկու անգամ գերազանցում է 40-օրյա պատերազմից առաջվա ցուցանիշը։ Սակայն այժմ այդ ցուցանիշն աճել է մինչև 2,5 անգամ»,- երեքշաբթի Թեհրանում անցկացված մամուլի ասուլիսի ժամանակ ասել է Թալաեյնիկը։

Նրա տվյալներով՝ սպառազինության որոշ տեսակների արտադրությունը աճել է ավելի քան երեք անգամ։ Գեներալը նշել է, որ պաշտպանական արդյունաբերության ծրագրերը ճշգրտվել են՝ հաշվի առնելով ռազմական ժամանակաշրջանի պահանջները։

Թալաեյնիկն արտադրության աճը կապել է իրանական տեխնոլոգիական ընկերությունների հնարավորությունների օգտագործման և հայրենական պաշտպանաարդյունաբերական հատվածի զարգացման հետ։ Նրա գնահատմամբ՝ սպառազինության մատակարարման համակարգի ռազմավարական խորությունը, ռազմական տեխնիկայի արտադրությունը երկրի ներսում և արտադրական հզորությունների ընդլայնումն Իրանի ազգային ուժի կարևոր բաղադրիչներն են։

Խոսելով ընթացիկ իրավիճակի մասին՝ Պաշտպանության նախարարության ներկայացուցիչը հայտարարել է, որ Իրանը ձեռք բերված արդյունքների ամրապնդման և ավելի քան յոթ ամիս տևած «սրբազան պաշտպանության» ավարտից հետո հակառակորդին հասցված պարտության վերջնականացման փուլում է։ Նա ընդգծել է, որ Իրանի դեմ ԱՄՆ-ի կամ Իսրայելի ցանկացած գործողություն կստանա «վճռական պատասխան» և կհանգեցնի հակառակորդի «ծանր պարտությունների»։

Թալաեյնիկը հայտարարել է նաև, որ Իրանի գլխավոր նպատակներից մեկը շարունակում է մնալ տարածաշրջանում ամերիկյան ռազմական ներկայության և Իսրայելի գործողությունների դադարեցումը։ Նա շեշտել է, որ Թեհրանը մտադիր է շարունակել այս ուղին։

Պաշտպանության նախարարության ներկայացուցիչն առանձին հայտարարել է, որ Իրանը չի մոռանա հակառակորդի գործողությունների հետևանքով զոհվածներին, նրանց թվում՝ նախկին պաշտպանության նախարար Ազիզ Նասիրզադեին, ինչպես նաև երեխաներին, ուսանողներին և մյուս զոհերին։ Նա ընդգծել է, որ ամերիկացի և իսրայելցի «մարդասպանների և ահաբեկիչների» պատժումը Իրանի անսասան դիրքորոշումն է։

Թալաեյնիկը նաև պատմել է Նասիրզադեի մահից հետո Պաշտպանության նախարարության աշխատանքի մասին։ Նա հավելել է, որ այդ ընթացքում գերատեսչությունը ղեկավարել է բրիգադի գեներալ Էբն ալ-Ռեզան, իսկ նախարարության աշխատանքը միտված է եղել նրա նախորդի սկսած ծրագրերի շարունակմանը։