նախընտրելի դարձնել
Ճառագայթային նորմալ թերապիայի անցկացման համար անհրաժեշտ են պետական մոտեցում եւ ֆինանսական ահռելի ռեսուրսներ: Այդ մասին այսօր՝ դեկտեմբերի 19-ի մամուլի ասուլիսում հայտնել է Հայ-ամերիկյան առողջության կենտրոնի տնօրեն Խաչանուշ Հակոբյանը:
«Մեր կառավարությունը սկսել է մտահոգվել այդ մասին, եւ շուտով Ֆիզիկայի ինստիտուտի տարածքում կտեղադրվեն այն բոլոր սարքավորումները, որոնք անհրաժեշտ են ուռուցքաբանական հիվանդությունների բուժման համար», - նշել է նա:
Մամուլի ասուլիսի մեկ այլ մասնակից, Հայ-ամերիկյան առողջության կենտրոնի գինեկոլոգիայի բաժանմունքի ղեկավար Մարինա Ոսկանյանը անդրադարձել է արգանդի վզիկի քաղցկեղի զարգացման առանձնահատկություններին: Նա նշել է, որ այդ հիվանդությունը չպետք է ինքնահետազոտմամբ բացահայտել: «Կինը չպետք է որեւէ ախտանշանների սպասի: Նա պետք է ամեն տարի համապատասխան բուժզննում անցնի», - ընդգծել է Ոսկանյանը:
Ըստ նրա՝ արգանդի վզիկի քաղցկեղը հնարավոր է ժամանակին կանխարգելել: Ճիշտ ախտորոշման եւ վիրահատության օգնությամբ կարելի է հարյուր տոկոսով հեռացնել արգանդի բորբոքված մասերը: «Բուժումից հետո կանայք կարող են առանց բարդությունների միանգամայն առողջ երեխաներ ունենալ», - եզրափակել է Մարինա Ոսկանյանը:
