Հունվարի վերջին բանտերի իրադրության դիտարկման նոր խումբ կհավաքագրվի: Պատժի իրագործման, պրոբացիայի եւ իրավաբանական օգնության նախարարի տեղակալ Սոֆո Ջափարիձեն  հայտնել է, որ խմբի ձեւավորման վերաբերյալ ոչ կառավարական հատվածի առաջարկները կընդունվեն մինչեւ  հունվարը 14-ը, որից հետո կսկսվի խմբի հավաքագրումը: 

Ըստ նրա` առայժմ հայտնի չէ, դիտարկման խմբում կլինեն արդյոք լրագրողներ եւ փաստաբաններ: Ջափարիձեն նաեւ նշել է, որ  խորհրդի անդամ կդառնա այն անձը, որը  կբավարարի Պատժի իրագործման նախարարության սահմանած պահանջները, հաղորդում է «Գռուզիա Online»-ը: «Խորհրդին անդամակցության համար անհրաժեշտ է  իրավաբանի, հոգեբանի, հոգեբույժի, բժշկի կամ սոցիալական աշխատողի  հնգամյա աշխատանքային փորձ, կամ էլ` իրավապաշտպանական կազմակերպությունում եռամյա աշխատանքային փորձ», - պարզաբանել է Սոֆո Ջափարիձեն:

Նշենք, որ հայտնի բանտային  սկանդալից հետո, որը հոկտեմբերի 1-ի խորհրդարանական ընտրություններից անմիջապես առաջ վերջնականապես գետնին հավասարեցրեց Վրաստանի նախագահ Միխայիլ Սահակաշվիլիի կուսակցության վարկանիշը,  բանտերում իրադրությունը գտնվում է  վրացական հանրության ուշադրության կենտրոնում: