նախընտրելի դարձնելՀայաստանի կրթության եւ գիտության նախարարի պաշտոնակատար Արմեն Աշոտյանն այսօր՝ ապրիլի 18-ին, ընդունել է ՀՀ-ում Հնդկաստանի դեսպան Սուրեշ Բաբու Թադիպանենիին եւ շնորհավորել Հայաստանում դիվանագիտական առաքելության ստանձնման կապակցությամբ:
ԿԳՆ մամուլի ծառայությունից հայտնում են, որ Աշոտյանը հույս է հայտնել, որ նոր դեսպանի գործունեությունը կնպաստի հայ-հնդկական կրթական համագործակցության ամրապնդմանը: Հանդիպման սկզբում կողմերն անդրադարձել են հայ եւ հնդիկ ժողովուրդների պատմական բարեկամությանը` նշելով, որ կրթությունը երկկողմ հարաբերություններում համագործակցության ավանդական ոլորտներից է:
Քննարկելով կրթական համագործակցության ծրագրերը՝ կարեւորվել են հատկապես բարձրագույն կրթության ոլորտում փոխադարձ կրթաթոշակային ծրագրերը: Որպես հաջողված փորձ՝ մատնանշվել է Մ. Հերացիի անվան պետական բժշկական համալսարանի հետ համագործակցությունը: Դեսպանն ընդգծել է, որ ներկայումս Հերացու անվան պետական բժշկական համալսարանում մոտ 700 հնդիկ ուսանողներ ստանում են մրցունակ բժշկական կրթություն, իսկ մինչ այդ սովորած ուսանողները արդեն համալրել են Հնդկաստանի առողջապահության համակարգը:
Դեսպան Սուրեշ Բաբու Թադիպանենին կարեւորել է, որ Երեւանի լեզվաբանական համալսարանում հնդկերենի ամբիոնի զարգացման, ինչպես նաեւ հնդկական մշակույթի եւ լեզվի նոր կենտրոնների հիմնադրման խնդիրը, նշելով, որ այս հարցի հետ կապված ակնկալում է ՀՀ ԿԳՆ աջակցությունը: Ա. Աշոտյանը շեշտել է, որ ՀՀ ԿԳՆ-ն պատրաստակամ է նպաստելու նման կենտրոնների բացմանն ու զարգացմանը:
Հանդիպման ընթացքում անդրադարձ է եղել նաեւ երկու երկրների միջեւ դիպլոմների փոխճանաչմանը, ուսանողների փոխանակման եւ մի շարք այլ ծրագրերի:
