Սիրիան մեր երկրի կարեւորագույն գործընկերներից է` կրթական համագործակցության առումով, մասնավորապես, արաբերեն լեզվի եւ մշակույթի ուսումնասիրության բնագավառում: Այս մասին, այսօր՝ հուլիսի 24-ին, Հայաստանում Սիրիայի գործերի ժամանակավոր հավատարմատար Մհդ. Իսսամ Նայալիի հետ հանդիպման ժամանակ նշել է ՀՀ կրթության եւ գիտության նախարար Արմեն Աշոտյանը:

ԿԳՆ մամուլի ծառայությունից հայտնում են, որ այդ համատեքստում նախարարը տեղեկացրել է, որ մինչեւ հայտնի ճգնաժամային իրավիճակը, 40 հայ երիտասարդներ սովորում էին Սիրիայի բուհերում` միաժամանակ ընդգծելով, որ ՀՀ բուհերը եւս գրավիչ են ինչպես սիրիահայերի,  այնպես էլ արաբ ուսանողների համար:

Ներկայումս էլ միջպետական համաձայնագրի շրջանակում Հայաստանում իրենց կրթությունը շարունակում են Սիրիայի բազմաթիվ քաղաքացիներ:  Ա. Աշոտյանը տեղեկացրել է նաեւ, որ ՀՀ կառավարությունն արտոնել է սիրիական ծրագրով «Կիլիկյան» վարժարանի գործունեությունը, ինչպես նաեւ արտոնություններ սահմանել սիրիահայ ուսանողների համար: Նախարարը նաեւ հույս է հայտնել, որ ճգնաժամից հետո հնարավոր կլինի շարունակել կրթական համագործակցությունը, մասնավորապես, կնքել դիպլոմների փոխճանաչման մասին համաձայնագիր: «Հայաստանի բուհերում կրթության որակը վերջին տարիների զգալի փոփխությունների է ենթարկվել, եւ գրեթե բացառվել են նախկինում երբեմն ծագող խնդիրները, այդ թվում նաեւ` օտարերկրյա ուսանողների կրթության որակի հետ կապված»,-նշել է Ա. Աշոտյանը:

Մհդ. Իսսամ Նայալին իր հերթին շնորհակալություն է հայտնել Հայաստանի կառավարությանը` Սիրիայի քաղաքացիներին տրված արտոնությունների համար: «Այդ աշակերտները եւ ուսանողները Սիրիայի քաղաքացիներ են, եւ մենք հպարտանում ենք նրանցով: Ապագա սերունդներն են կերտում ազգի եւ պետության ապագան: Սիրիայի հայերն ապացուցեցին իրենց հավատարմությունը Սիրիայի պետությանը ճգնաժամային այս պայմաններում, եւ ես հուսով եմ, որ նրանք սպասում են իրենց վերադարձին Սիրիա: Հայաստանի դիրքորոշումն արժանի է ամենայն հարգանքի եւ գնահատականի: Հպարտ ենք հարուստ մշակույթ եւ ավանդույթներ ունեցող հայ ժողովրդի բարեկամությամբ: Հայաստանը Սիրիայի հավատարիմ ընկերն է, եւ հուսով եմ, որ մեր երկիրը կհաղթահարի ճգնաժամն իր ժողովրդի, բանակի եւ իր բարեկամ երկրների շնորհիվ»,-նշել է Մհդ. Իսսամ Նայալին` հավաստիացնելով, որ տեղյակ է վերջին տարիներին արձանագրված Հայաստանի կրթության որակի բարձր մակարդակից:

Ի պատասխան` Արմեն Աշոտյանը նշել է, որ միմիայն Սիրիայի ժողովուրդն է իր ապագայի կերտողը: Նախարարը խաղաղություն,  համբերություն եւ ուժ է մաղթել Սիրիայի ժողովրդին`  հաղթահարելու առկա դժվարությունները: Ա. Աշոտյանը հույս է հայտնել, որ Սիրիայում կվերահաստատվի խաղաղություն եւ իր ողջ ծավալով կվերականգնվեն ամբողջ գիտակրթական կապերը, այդ թվում` կվերագործարկվի Հալեպի համալսարանի հայագիտական կենտրոնը:

Հանդիպման ավարտին նախարարն առաջարկել է նոր ուսումնական տարում միասին այցելել «Կիլիկյան» վարժարան, ինչպես նաեւ հանդիպում ունենալ սիրիացի ուսանողների հետ: