Հայաստանի ոստիկանությունն առայժմ չի ավարտել Մանվել Հազրոյանի մահվան հանգամանքների հետաքննությունը: Այս մասին NEWS.am-ի թղթակցի հետ զրույցում հաղորդել են Ոստիկանության մամուլի ծառայությունից:

Այս պահին նշանակված փորձաքննությունների արդյունքները դեռ չեն ստացվել, ընդգծել են Ոստիկանությունում:

Նախկին զինվոր Մանվել Հազրոյանին, ով ծառայակիցների սպանության համար ցմահ ազատազրկման էր դատապարտվել, հունիսի 19-ին կախված են գտել «Նուբարաշեն» ՔԿՀ-ում:

Սյունիքի մարզի ընդհանուր իրավասությունների դատարանը 11.11.2011թ Մանվել Հազրոյանին ցմահ ազատազրկման է ենթարկել ՀՀ ՔՕ համապատասխան հոդվածների համապատասխան: Մանվել Հազրոյանը, կենցաղային հողի վրա կատարված պատահարի արդյունքում կրակել էր ծառայակիցների վրա: Լեւոն Եսայանը (1991թ. ծնված),  Ներսես Գալոյանը(1990 թ. ծնված), Նարեկ Սահակյանը  (1990 թ. ծնված)  եւ Նվեր Սարգսյանը մահացել են: Սարգիս Մելքումյանը  (1991թ. ծնված),  Խաչիկ Ալեքսանյանը (1992 թ. ծնված),  Մասիս Գրիգորյանը (1991թ. ծնված),  եւ ինքը` Մանվել Հազրոյանը, տարբեր աստիճանի ծանրության հրազենային վնասվածքներ էին ստացել: