նախընտրելի դարձնել
Սոցիալական ինտեգրված ծառայությունների ներդրման ուղղությամբ իրականացվող պիլոտային ծրագրով ձեւավորվել են համալիր սոցիալական ծառայությունների 19 տարածքային կենտրոններ, որոնցից 6-ն արդեն գործարկվել է: Այս մասին, այսօր՝ հուլիսի 26-ին, սոցիալական ինտեգրված ծառայությունների համակարգի կառավարման խորհրդի հերթական նիստի ժամանակ նշել է ՀՀ աշխատանքի եւ սոցիալական հարցերի նախարար Արտեմ Ասատրյանը: Նիստը վարել է վարչապետ Տիգրան Սարգսյանը:
Նրա խոսքով՝ մնացած կենտրոններում ընթացքի մեջ են համակարգչային ցանցի անցկացման, համակարգչային տեխնիկայի եւ կահույքի տրամադրման աշխատանքները, որոնք նույնպես առաջիկայում ավարտին կհասցվեն: Նախարարի հաղորդմամբ` իրականացվել են տեղեկատվական համակարգերի ներդրման, տարածքային կենտրոնների վերանորոգման եւ աշխատողների վերապատրաստման աշխատանքներ:
Արծարծվել են տարածքային կենտրոնների ամբողջական գործարկման անհրաժեշտ պայմանների ապահովման, այդ թվում` պահպանմանը եւ տեխնիկական սպասարկմանը վերաբերող հարցեր, որոնց լուծման առնչությամբ վարչապետը համապատասխան հանձնարարականներ է տվել պատասխանատու գերատեսչություններին: Քննարկվել է նաեւ ինտեգրված սոցիալական ծառայությունների համակարգի ֆինանսավորման մոդելի հարցը:
Համակարգի արդյունավետ ներդրման գործում վարչապետ Տիգրան Սարգսյանը կարեւորել է շահագրգիռ գերատեսչությունների միջեւ շարունակական համագործակցությունը` պիլոտային ծրագրի ընթացքում հնարավոր խնդիրների բացահայտման եւ լուծման առումով:
Սոցիալական ինտեգրված ծառայությունների համակարգի ներդրման արդյունքում քաղաքացիները ցանկացած սոցիալական խնդրով պետք է դիմեն սոցիալական ինտեգրված ծառայությունների տարածքային կենտրոնների միասնական ընդունարան, ինչի համար մշակվել է դիմումների հաշվառման միասնական համակարգ: Ընդունարանը գործելու է մեկ պատուհանի սկզբունքով:
