Դանիայի թագավորական ընտանիքի Հելոուինից հետո հրապարակած նկարը, որն արվել է Գլյուքսբուրգների դինաստիայի 150-ամյակի կապակցությամբ,  սուր քննադատության առարկա է դարձել: Տեսաբանները լուրջ քննադատության են ենթարկել հեղինակին` դանիացի նկարիչ Թոմաս Կլյուգին, որը դինաստիայի անդամներին ներկայացրել է ոչ թե լուսավոր դեմքերով եւ փառահեղ  կեցվածքով, ինչպես որ պահանջում է ժանրի ավանդույթը,  այլ մռայլ հայացքներով`միջնադարյան փլատակների չարագուշակ ստվերներում:

Այդ պատճառով էլ քննադատները «Թագավորական տուն» կտավը (նկարում պատկերված են թագուհի Մարգրեթե II-ը եւ արքայազն  Հենրիկը, նրանց որդիները կանանց հետ` Ֆրեդերիկը եւ Յոհակիմը, ինչպես նաեւ ութ թոռները) հաճախ համեմատում են սարսափ ֆիլմերի ցուցապաստառի հետ, հաղորդում է ԻՏԱՌ-ՏԱՍՍ-ը:

 «Մոգական ռեալիզմի» ոճով կտավի վրա չորս տարի աշխատած նկարիչը զարմացած է թշնամական քննադատությունից: Կլյուգեն պնդում է, որ թագուհի Մարգրեթե II-ը հավանել է իր աշխատանքը:

Դանիայի Թագավորական տունը նկարի շուրջ ծավալված տարաձայնությունները չի մեկնաբանում: