Բնապահպանության նախարարության հունվարի 8-ից մինչեւ փետրվարի 1-ն ընկած ժամանակահատվածում իրականացրած շրջայցերի, Նախարարության վարույթին հանձնված գործերի քննության եւ տարեկան հաշվետվությունների ընդունման գործընթացում հայտնաբերված խախտումների արդյունքում կայացվել է 1.02մլն դրամ ընդհանուր գումարով վարչական տուգանքի 16 որոշում եւ հաշվարկվել է 1.38մլն դրամ ընդհանուր գումարի շրջակա միջավայրին հասցված վնաս: Ընդհանուր առմամբ պետական բյուջե մուտք է եղել 36.21մլն դրամ գումար:
Լոռու տարածքային ստորաբաժանման վարույթին հանձնված ապօրինի ծառահատման տասնմեկ գործով կայացվել է 570 հազար դրամ ընդհանուր գումարի վարչական տուգանքի տասը որոշում եւ հաշվարկվել է 1 մլն 375,5 հազար դրամ ընդհանուր գումարի շրջակա միջավայրին հասցված վնաս:
Վայոց Ձորում հայտնաբերված ձկան ապօրինի որսի դեպքի համար մեկ ֆիզիկական անձի նկատմամբ կայացվել է 50 հազար դրամ գումարի վարչական տուգանքի որոշում եւ հաշվարկվել է 3 հազար դրամ գումարի շրջակա միջավայրին հասցված վնաս:
Բնապահպանական եւ բնօգտագործման վճարի եռամսյակային եւ տարեկան վարչական վիճակագրական հաշվետվությունները սահմանված ժամկետում չներկայացնելու համար Արագածոտնում երեք տնտեսվարող տուգանվել է 300 հազար-ական դրամով:
Շիրակում եւ Արարատում մեկական տնտեսվարող տուգանվել է 50 հազարական դրամով:




























