ՆախընտրելիՀռոմի Ֆրանցիսկոս պապը, ով պատրաստվում է այցելել Սուրբ հող, քրիստոնեության եւ հուդայականության միջեւ հարաբերությունների մասին նոր հայտարարությամբ է հանդես եկել։
«Թող կաթոլիկների եւ հուդայականների միջեւ փոխըմբռնումն ու բարեկամությունը ժառանգվի նոր սերունդներին։ Եվ հուդայականները, եւ քրիստոնյաները կարող են միաբան լինել առավել արդար եւ եղբայրական աշխարհ ունենալու համար»,- փոխանցում է ԻՏԱՌ-ՏԱՍՍ-ը։
Այնուհետեւ հռոմեական կաթոլիկ եկեղեցու առաջնորդը հիշեցրել է ապագա սերունդներին փոխադարձ գիտելիքների, հարգանքի եւ բարեկամության փոխանցման անհրաժեշտությունը:
Տեսաբաններն այս կապակցությամբ հիշեցնում են, որ անցյալ տարվա սեպտեմբերին իտալական La Reppublica թերթի հարցազրույցում Ֆրանցիսկոսը նշել էր, որ հրեաները քրիստոնեության սուրբ արմատն են: «Աստված երբեք չի ընդհատել իր կապերը Իսրայելի ժողովրդի հետ, որը, չնայած վերջին դարերի դաժան փորձություններին, պահպանել է հավատն առ Աստված: Մենք՝ որպես քրիստոնեական եկեղեցի, ինչպես նաեւ ողջ մարդկությունը, հավերժ պարտական ենք նրանց»:
