նախընտրելի դարձնելԵս զարմացած եմ, որ Վահրամ Բաղդասարյանը տեղեկություն ունի, թե ընդդիմադիր պատգամավորները ֆինանսավորվում են ալիեւյան նավթադոլարներով, իսկ ՀՀ ԱԱԾ-ն այդ մասին կամ չգիտի կամ էլ հետաքրքրված չէ ԱԺ նախորդ քառօրյային արված նրա հայտարարությամբ, նոյեմբերի 10-ին խորհրդարանի նիստում հայտարարել է ընդդիմադիր պատգամավոր Նիկոլ Փաշինյանը՝ պատասխանելով ՀՀԿ խմբակցության ղեկավար Վահրամ Բաղդասարյանի ավելի վաղ հնչած հարցին:
Փաշինյանն ԱԱԾ-ին կոչ է արել զբաղվել Բաղդասարյանի հայտարարությամբ եւ համապատասխան միջոցներ ձեռնարկել այդ դավաճաններին բացահայտելու համար: «Թող հայտնաբերի ալիեւյան նավթադոլարներով ֆինանսավորվող պատգամավորներին, եթե այդպիսիք կան, ապա նրանց գործունեությունը պետք է բացահայտվի: Իսկ եթե պարզվի , որ այս դահլիճում նման մարդիկ չկան, ապա ստիպված գրանցելու ենք, որ Հայաստանի իշխանությունների համար Ալիեւը «մշուշ է», որի քողի տակ կատարում են իրենց «մութ գործերը»: Պատգամավորը նաեւ նշել է, որ հետեւողական կլինի այդ հարցում:
NEWS.am-ն ավելի վաղ հայտնել էր, որ Վահրամ Բաղդասարյանն ընդդիմադիր պատգամավորներին մեղադրել էր Ադրբեջանին ծախված լինելու մեջ: «Ամեն անգամ Հայաստանի եւ Ադրբեջանի նախագահներին հանդիպման նախօրեին խորհրդարանի նիստերի դահլիճում սկսում է ադրբեջանական նավթադոլարների հոտ գալ»: Բաղդասարյանի խոսքն ընդհատել էին դահլիճում նստած ընդդիմադիր պատգամավորներ Նիկոլ Փաշինյանը եւ «Ժառանգության» անդամ Զարուհի Փոստանջյանը: Խորհրդարանի խոսնակ Գալուստ Սահակյանը պատգամավորներին կարգի էր հրավիրել:
