ՀՀ նախագահ Սերժ Սարգսյանն այսօր ընդունել է գերմանական Մարշալ եւ Ռոբերտ Բոշ հիմնադրամների ներկայացուցիչներին:

Նախագահը ողջունել է ներկայացուցչական պատվիրակությանը Հայաստանում եւ շնորհակալություն հայտնել վերոնշյալ հիմնադրամներին՝ նման ձեւաչափով քննարկում կազմակերպելու համար: Սերժ Սարգսյանը կարեւորել է պետությունների ղեկավարների հետ արդեն ավանդույթ դարձած այսպիսի հանդիպումները, որոնք, նրա համոզմամբ, հնարավորություն են ընձեռում անմիջականորեն շփվելու ակադեմիական եւ վերլուծական շրջանակների հետ: Նշելով, որ Մարշալ հիմնադրամն իր ստեղծման առաջին իսկ օրվանից կոչված է եղել նպաստելու միջազգային խաղաղության, անվտանգության, կայունության, ժողովրդավարության ամրապնդմանը, տնտեսական զարգացմանն ու ժողովուրդների բարեկեցությանը, Հանրապետության նախագահն ընդգծել է, որ Հայաստանի համար հատկապես կարեւոր է հիմնադրամի առաքելություններից մեկը՝ համաշխարհային մարտահրավերներին միասնական ուժերով դիմակայելու եւ դրանք հաղթահարելու կառուցակարգերի մշակումը:

Սերժ Սարգսյանի խոսքով, դա մեր պետության համար առանձնակի կարեւորություն է ստանում այս տարի, նկատի առնելով, որ Հայաստանի արտաքին քաղաքականության հիմնական շեշտադրումը հանդուրժողականության եւ միասնականության կոչն է միջազգային հանրությանը: Միասնականությունը կարեւորվել է հատկապես, երբ ընթացիկ տարում ոգեկոչվում է 20-րդ դարի առաջին ցեղասպանության՝ Հայոց ցեղասպանության, 100-րդ տարելիցը: Նախագահն ակնհայտ ճշմարտություն է համարել այն, որ ցեղասպանությունները, որպես մարդկության դեմ ծանրագույն հանցագործություններ, տեղի են ունենում կամ կրկնվում են միջազգային հանրության կողմից ոչ միասնական դիրքորոշման պատճառով:

Սերժ Սարգսյանը հանդիպման մասնակիցներին ներկայացրել է Հայաստանում եւ արտերկրում Հայոց ցեղասպանության 100-րդ տարելիցի ոգեկոչման միջոցառումների խորհուրդը, ներածական իր խոսքում անդրադարձել նաեւ Հայաստանի արտաքին քաղաքականության առաջնահերթություններին, ԼՂ հիմնախնդրի խաղաղ կարգավորման բանակցային գործընթացին, Հայաստան-Թուրքիա հարաբերություններին, տարածաշրջանի խնդիրներին ու մարտահրավերներին:

Նախագահը պատասխանել է նաեւ Մարշալ եւ Ռոբերտ Բոշ հիմնադրամների ներկայացուցիչներին հետաքրքրող հարցերին, որոնք վերաբերել են ինչպես վերոնշյալ թեմաներին, այնպես էլ Հայաստան-Եվրամիություն հարաբերություններին ու համագործակցության զարգացման հեռանկարին, Հայաստանի տնտեսության զարգացման դինամիկային եւ արտաքին գործոններով պայմանավորված հնարավոր դժվարություններին ու մարտահրավերներին, ԵՏՄ-ին անդամակցելուց հետո Հայաստանի տնտեսական զարգացման նոր հնարավորություններին, ներքաղաքական վիճակին եւ այլն: