նախընտրելի դարձնել
ՀՀ քաղաքացիական վերաքննիչ դատարանը մասնակի բավարարել է ՀՀ նախագահի նախկին թեկնածուներ Վարդան Սեդրակյանի և Պարույր Հայրիկյանի վերաքննիչ բողոքները: Այս մասին NEWS.am-ը տեղկացավ Դատական տեղեկատվական համակարգից:
Նշենք, որ Պարույր Հայրիկյանի՝ որպես իրեն պատճառված վնաս՝ իր մահափորձի համար 14 տարվա ազատազրկման դատապարտված Վարդան Սեդրակյանից, Խաչիկ Պողոսյանից ու Սամվել Հարությունյանից 42,5 միլիոն դրամ փոխհատուցելու հայց էր ներկայացրել: Այնուհետեւ թե Հայրիկյանը, թե Վարդան Սեդրակյանը, առաջին ատյանի որոշումը՝ հայցի մասնակի բավարարման մասին, բողոքարկել են այն Վերաքննիչ դատարանում:
Վերաքննիչ դատարանը որոշել է Վարդան Սեդրակյանի բողոքը բավարարել մասնակի, մասնավորապես՝ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի փետրվարի 13-ի վճիռը 41.000.000 ՀՀ դրամ գումար բռնագանձելու մասով բեկանել և այդ մասով գործն ուղարկել նույն դատարան` նոր քննության: Որոշման մեջ նշվում է, որ Վարդան Սեդրակյանի վերաքննիչ բողոքի համար նախատեսված պետական տուրքի հարցին անդրադառնալ գործի նոր քննության արդյունքում կայացվելիք դատական ակտով:
Ինչ վերաբերում է Հայրիկյանի բողոքին, ապա այն եւս մասնակի է բավարարվել: Դատարանը որոշել է, որ 42,5 մլն դրամ
գումարի նկատմամբ նախատեսված տոկոսների բռնագանձման հայցապահանջը մերժելու մասով դատարանի վճիռը թողնել օրինական ուժի մեջ, իսկ այդ գումարի նկատմամբ սահմանված կարգով հաշվարկվող տոկոսների գումարի 2 տոկոսը Պարույր Հայրիկյանից որպես պետական տուրքի գումար բռնագանձելու մասով դատարանի վճիռը բեկանել և փոփոխել` այդ մասով պետական տուրքի հարցը համարել լուծված:Պարույր Հայրիկյանի վերաքննիչ բողոքի համար նախատեսված պետական տուրքի հարցը համարել լուծված:
Հիշեցնենք, որ Տպագրիչների 9 հասցում 2013թ. հունվարի 31-ին, ժամը 23.30-ին նախագահի թեկնածու, ԱԻՄ նախագահՊարույր Հայրիկյանի դեմ մահափորձ էր կատարվել իր իսկ տան դիմաց: Օրեր անց ձերբակալվել էր նախագահի մեկ այլ թեկնածու Վարդան Սեդրակյանը, ում 2013թ. սեպտեմբերին Կենտրոն եւ Նորք Մարաշ ընդհանուր իրավասության դատարանը դատապարտել էր 14 տարվա ազատազրկման:
