Արցախում մարտական հենակետում հունիսի 11-ին մահացած ժամկետային զինծառայող 20-ամյա Էդգար Մելքոնյանը Քաշաթաղի շրջկենտրոն Բերձորից էր: Այս մասին NEWS.am-ի թղթակցին հայտնեցին Քաշաթաղի վարչակազմից:

Նրանց խոսքով՝ նախնական տվյալներով դեպքը տեղի է ունեցել զենքի հետ վարվելու կանոնները խախտելու հետեւանքով:

«Քույր ու եղբայր ուներ Էդգարը, հայրն էլ աշխատում է վարչակազմի կոմունալ ծառայությունում, տրակտոր է վարում մեզ մոտ: Նորմալ ապրող ընտանիք են»,- հայտնեցին վարչակազմից:

Նշենք, որ դեպքի առթիվ հարուցվել է քրեական գործ Քրեական օրենսգրքի 110-րդ հոդվածի 1-ին մասով (ինքնասպանության հասցնելը): Ըստ Քննչական կոմիտեի տարածած հաղորդագրության՝ ժամկետային զինծառայող, շարքային Էդգար  Մելքոնյանը, ըստ նախնական տվյալների, իրեն ամրակցված ինքնաձիգից ինքն իրեն ծնոտի շրջանում հասցրել է մահացու հրազենային վնասվածք:

Ավելի վաղ հայտնել էինք, որ  հունիսի 11-ին` ժամը 01:30-ի սահմաններում, ՊԲ հարավային ուղղությամբ տեղակայված զորամասերից մեկի պահպանության տեղամասի մարտական հենակետում զոհվել է ժամկետային զինծառայող, 1995թ. ծնված Էդգար Գենադիի Մելքոնյանը: Դեպքի մանրամասները պարզելու համար կատարվում է քննություն: