նախընտրելի դարձնել
Այս պայքարը կարող է ոչ միայն կասեցնել էլեկտրաէներգիայի սակագնի բարձրացումը, այլեւ նվազեցնել էլեկտրաէներգիայի սակագինը: Այս մասին այսօր՝ հունիսի 23–ին, NEWS.am-ի հետ զրույցում ասաց ԱԺ «Ժառանգություն» խմբակցություն պատգամավոր Զարուհի Փոստանջյանը՝ նշելով, որ ոստիկանների գործողությունները դատապարտելի են:
«Ոստիկանների գործողությունները դատապարտելի են, ուժ կիրառելը ոչ միայն իրավաբանական տեսանկյունից է ոչ համաչափ, այլեւ անբարոյական արարք է: Հորդորում ենք բոլորին լինել սթափ, մասնավորապես՝ ոստիկանական ուժերին` զերծ մնալ ապօրինի հրամաներ կատարելուց եւ թույլ տալ, որպեսզի մեր քաղաքացիներն իրենց բողոք-պահանջը հայտնեն եւ իրենց սահմանադրական իրավունքներն իրացնեն»,-ասաց նա:
Պատգամավորը նշեց, որ չի վախենում առաջին գծում լինելուց, ոչ միայն այստեղ այլեւ հանրապետության բոլոր հրապարակներում պետք է հավաքվեն մարդիկ, որպեսզի ոստիկանները չկարողանան բռնություններ կիրառել:
Նշենք, որ չորս օր տեւած նստացույցից հետո հունիսի 22-ին ավարտվել էր «Ոչ թալանին» նախաձեռնության՝ իշխանություններին տված վերջնաժամկետը, եւ ցուցարարները մեծ բազմությամբ շարժվել էին դեպի Բաղրամյան պողոտա։ Ոստիկաննեը փակել էին պողոտան, ինչից հետո նստացույց էր սկսվել։ Հունիսի 23-ին վաղ առավոտյան ոստիկանները ջրցան մեքենայի օգնությամբ ցրել են ցույցը, ապա բերման ենթարկել ակտիվիստների եւ լրագրողների:
Հիշեցնենք, որ չնայած էլեկտրաէներգիայի սակագնի բարձրացման դեմ ուղղված բազմաթիվ բողոք-ակցիաներին հունիսի 17-ին, ՀԾԿՀ հանձնաժողովի նիստում հաստատվել է էլեկտրաէներգիայի նոր սակագինը։ էլեկտրաէներգիան թանկացել է 6.93 դրամով՝ մեկ կՎտ/ժ-ի դիմաց 41.85 դրամից դառնալով 48.78 դրամ։ «Հայաստանի էլեկտրական ցանցեր» (ՀԷՑ) ընկերությունը առաջարկել էր էլեկտրաէներգիայի մեկ կիլովատտ/ժամը թանկացնել 17 դրամով:
