ՀՀ քննչական կոմիտեի Երեւան քաղաքի Կենտրոն եւ Նորք-Մարաշ վարչական շրջանների քննչական բաժնում հարուցվել է քրեական գործ` Երեւան քաղաքի Սայաթ-նովա 35 շենքի բակում առկա խաղահրապարակի նստարանի վրայից «Սամսունգ Գալաքսի թաբ 3» մոդելի պլանշետ գողանալու դեպքի առթիվ, որի  շրջանակներում ձեռնարկվում են միջոցներ՝ պարզելու առերեւույթ հանցագործություն կատարած անձի ինքնությունը:

Քաղաքացի Ա.Մկրտումյանը ոստիկանության բաժին հաղորդում է ներկայացրել առ այն, որ 2015թ. մայիսի 24-ին՝ ժամը 15:00-ից մինչեւ 16:00-ն ընկած ժամանակահատվածում, առերեւույթ հանցագործություն կատարած անձը Երեւան քաղաքի Սայաթ-նովա 35 շենքի բակում առկա խաղահրապարակի նստարանի վրայից գաղտնի հափշտակել է իրեն պատկանող, զգալի չափերի՝ 100.000 ՀՀ դրամ արժողությամբ «Սամսունգ Գալաքսի թաբ 3» մոդելի պլանշետ:

Դեպքի առթիվ հարուցվել է քրեական գործ՝ ՀՀ քրեական օրենսգրքի 177-րդ հոդվածի 1-ին մասի հատկանիշներով:

Նախաքննության ընթացքում ստացվել են տեսանկարահանող սարքերի՝ տվյալ օրվա  տեսագրությունները, որոնցում պատկերված է Սայաթ-Նովա 35 շենքի բակում՝ մոտակայքում գտնվող կամարանցումում տեղի ունեցող անցուդարձը, զննվել։

Տեսագրության մեջ  երեւում է մոտ 25-30 տարեկան, սեւ պայուսակով, մոխրագույն կիսաշրջազգեստով մի աղջիկ եւ բազմակողմանի, օբյեկտիվ, լրիվ քննություն իրականացնելու նպատակով միջոցներ են ձեռնարկվում նրան հայտնաբերելու ուղղությամբ։

Խնդրում ենք լուսանկարներում պատկերված անձին կամ այն անձանց, ովքեր ճանաչում են նրան  կամ որեւէ տեղեկություն ունեն նրա ինքնության, գտնվելու վայրի  մասին,  ներկայանալ կամ հայտնել ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք-Մարաշ վարչական շրջանների քննչական բաժին։