Լեռնային Ղարաբաղի խնդրի կարգավորման շուրջ քննարկումներն այլ ձեւաչափեր տեղափոխելու փորձերը վնասակար են: Այս մասին նշվել է այսօր՝ նոյեմբերի 18-ին, Երեւանում ՀՀ արտգործնախարար Էդվարդ Նալբանդյանի եւ ԱՄՆ պետքարտուղարի եվրոպական եւ եվրասիական հարցերով փոխտեղակալ Բրիջիթ Բրինքի հանդիպման ժամանակ:

ԱԳՆ-ից NEWS.a,_ին հայտնում են, որ ողջունելով հյուրին` Հայաստանի արտգործնախարարը գոհունակություն հայտնեց հայ-ամերիկյան բարեկամական գործընկերության բարձր մակարդակի կապակցությամբ՝ ընդգծելով, որ վերջին տարիներին համատեղ ջանքերով երկկողմ հարաբերություններում դրական առաջընթաց է արձանագրվել, ինչը լայն հնարավորություններ է ստեղծում՝ փոխգործակցության առավել ամրապնդման ու ընդլայնման համար:

Շնորհակալություն հայտնելով ընդունելության համար՝ Բրիջիթ Բրինքը նշեց, որ Միացյալ Նահանգները բարձր են գնահատում Հայաստանի հետ գործընկերային հարաբերությունները եւ շահագրգռված են դրանց հետագա խորացմամբ ու նպատակադրված են գործուն քայլեր ձեռնարկել այդ ուղղությամբ:

Զրուցակիցներն անդրադարձան հայ-ամերիկյան տնտեսական փոխգործակցության զարգացման հեռանկարներին, մտքեր փոխանակվեցին նոյեմբերի 17-ին Երեւանում տեղի ունեցած՝ Առեւտրի եւ ներդրումների հայ-ամերիկյան խորհրդի անդրանիկ հանդիպման արդյունքների վերաբերյալ:

Այդ առումով Բրիջիթ Բրինքն ասաց. «Հպարտ եմ, որ Միացյալ Նահանգները օտարերկրյա ուղղակի ներդրումների ծավալներով խոշորագույն ներդրողներից մեկն են Հայաստանում, եւ լիահույս եմ, որ Տնտեսական համագործակցության հարցերով հայ ամերիկյան միջկառավարական աշխատանքային խմբի եւ Առեւտրի ու ներդրումների հայ ամերիկյան խորհրդի՝ այս շաբաթվա երեւանյան հանդիպումների միջոցով կկարողանանք վերհանել ներդրողների վստահությունը Հայաստանի նկատմամբ առավել մեծացնելու ուղիներ: Բարձր մակարդակի հանդիպումների այս շարքը մեզ կօգնի ձեւավորել առավել շահեկան առեւտրային գործընկերություն»:

Հայաստանի արտգործնախարարը եւ ԱՄՆ պետքարտուղարի փոխտեղակալը մտքեր փոխանակեցին ղարաբաղյան հիմնախնդրի խաղաղ կարգավորման գործընթացի վերաբերյալ՝ շեշտելով հրադադարի ռեժիմի խախտումների անթույլատրելիությունը։ Երկուստեք ընդգծվեց, որ խնդրի կարգավորման շուրջ քննարկումներն այլ ձեւաչափեր տեղափոխելու փորձերը վնասակար են։

Էդվարդ Նալբանդյանն ու Բրիջիթ Բրինքը հանգամանալից քննարկում ծավալեցին միջազգային եւ տարածաշրջանային խնդիրների, ահաբեկչության դեմ պայքարի, հակամարտությունների կարգավորման ուղիների վերաբերյալ: ԱՄՆ պետքարտուղարի փոխտեղակալը բարձր գնահատեց Հայաստանի ներդրումը գլոբալ անվտանգության ապահովման գործում եւ մասնակցությունը այլ երկրներում խաղաղապահ գործողություններին։