ՆախընտրելիՀայաստանի կառավարությունն իր այսօրվա նիստին այդպես էլ որոշում չի ընդունել հունվարի 8-ի աշխատանքային օրը տեղափոխելու մասին:
Անցյալ տարիներին Հայաստանում որոշակի ավանդույթ էր ձեւավորվել, երբ Նոր տարվա շեմին կառավարության որոշմամբ բնակչությանը ամանորյա արձակուրդ էր տրվում մինչեւ հունվարի 10-11-ը:
«Տոների եւ հիշատակի օրերի մասին» օրենքի համաձայն, Սուրբ ծննդի եւ Նոր տարվա տոները Հայաստանում նշվում են դեկտեմբերի 31-ից մինչեւ հունվարի 6-ը, իսկ հունվարի 7-ը հանրապետությունում ոչ աշխատանքային օր է, որովհետեւ Քրիստոսի ծննդին հետեւող Մեռելոցն է:
Ակնկալվում էր, որ կառավարությունն այս անգամ էլ ուրբաթ օրվա աշխատանքային օրը (հունվարի 8) կտեղափոխի երկուշաբթի` հունվարի 11-ին կամ էլ հաջորդ շաբաթ օրը` հունվարի 16-ին, սակայն դա տեղի չունեցավ: Այսպիսով`Հայաստանի բնակիչներին Նոր տարվա տոնակատարությունների համար ընդամենը ութ օր է հատկացվել:
Ինչպես NEWS.am-ին հայտնել են կառավարությունից, հնարավոր է, որ մինչեւ տարվա վերջ կառավարությունը եւս մեկ նիստ անցկացնի, որի ընթացքում պարզաբանվի ձմեռային արձակուրդի հետ կապված իրավիճակը:
