նախընտրելի դարձնելՆոր Հայաստան փրկության ճակատի երկու ներկայացուցչի` Աշոտ Պետրոսյանին եւ Ժորժիկ Իսայանին, այսօր` հունվարի 3-ին, բերման են ենթարկել ոստիկանության Մալաթիայի բաժին: Այս մասին NEWS.am-ի հետ զրույցում հաստատեցին ոստիկանության լրատվական ծառայությունից` հայտնելով, որ նրանք բերման են ենթարկվել ոստիկանության 4-րդ գումարտակի հրամանատար Գեղամ Խաչատրյանի տան մոտ սպառնալիքներ հնչեցնելու գործի շրջանակում:
Նրանք բերման են ենթարկվել Կենտրոն եւ Նորք Մարաշ դատարանի մոտից, որտեղ մասնակցում էին Գեւորգ Սաֆարյանին նվիրված բողոքի ակցիային:
Նշենք, որ այս գործի շրջանակում բերման էր ենթարկվել հինգ քաղաքացի, որոնք ավելի ուշ ազատ էին արձակվել: Քիչ առաջ ազատ է արձակվել նաեւ Հիմնադիր խորհրդարանի անդամ Գրիգոր Եղնուկյանը:
Ոստիկանության լրատվական ծառայությունից մեզ հետ զրույցում հայտնել էին, որ նրանք բերման են ենթարկվել սպանության սպառնալիքի ու ուրիշի գույքը դիտավորությամբ ոչնչացնելու կասկածանքով: Ճակատի ներկայացուցիչ Վարուժան Ավետիսյանը մեզ հետ զրույցում վստահեցրեց, որ նման սպառնալիքներ չեն հնչել:
«Նոր Հայաստան» ճակատի համակիրները այսօր Գեղամ Խաչատրյանի տան մոտ բողոքի ակցիա էին իրականացրել այն պատճառով, որ Գեղամ Խաչատրյանը ֆեյսբուքյան իր էջում կապիկներ էր անվանել Ազատության հրապարակում այս օրերին ցույց անողներին:
