նախընտրելի դարձնել
Շվեյցարական լրատվամիջոցների տեղեկությունների համաձայն, պանամական փաստաթղթերում առկա է Վրաստանի պաշտպանության նախկին նախարար Դավիթ Կեզերաշվիլիի անունը, հայտնում է «Գրուզիա On-line»-ը:
Շվեյցարական Tribune de Geneve պարբերականը գրում է, որ 2006-ին, երբ Դավիթ Կեզերաշվիլին զբաղեցրել է իր պաշտոնը, նա ընդամենը մի բնակարան ուներ:
«2008-ի դեկտեմբերին, ռուս-վրացական հակամարտությունից հետո նա ստիպված էր թողնել պաշտոնը… եւ շուտով օլիգարխ է դարձել»,- գրում է Tribune de Geneve-ը:
Պարբերականի տեղեկության համաձայն, Կեզերաշվիլիի հրաժարականից 10 օր անց վստահված անձը նրա համար երեք օֆշորային ընկերություն է ստեղծել: Այդ ընկերությունների հաշվին են փոխանցվել նավթի վաճառքից խոշոր գումարներ:
Tribune de Geneve-ի տեղեկության համաձայն, «պանամական փաստաթղթերից» պարզ է դառնում, որ 2012-ին Կեզերաշվիլիի օֆշորային ընկերություններից մեկը հաշիվ է բացել շվեյցարական Banque Cantonale de Geneve (BCGE) բանկում, որին 20 մլն ֆրանկ է փոխանցվել: Բացի այդ, շվեյցարական մի քանի բանկերին (ABN AMRO и BNP Paribas) համանման եղանակով եւս 25 մլն ֆրանկ է փոխանցվել:
Շվեյցարական պարբերականը նաեւ նշում է, որ 2013-ին Դավիթ Կեզերաշվիլիի դեմ հետաքննություն է սկսվել եւ Ինտերպոլը նրա ձերբակալության հրաման է տվել: Հետաքննության սկզբից հետո` 2013-ի մայիս-հունիսին Կեզերաշվիլիի վստահված անձն անսպասելիորեն պանամական իրավաբանական Mossack Fonseca ընկերությանը խնդրել է փաստաթղթերը գրանցել հետին թվով: Այնուհետեւ` մինչեւ դատաքննության սկիզբը Կեզերաշվիլին իր բոլոր ակտիվները փոխանցել է այլ օֆշորային ընկերությունների:
Tribune de Geneve-ի տեղեկության համաձայն, Կեզերաշվիլիի վստահված անձը պատասխանել է, որ ինքը ֆինանսական միջնորդի դեր չի կատարել եւ իր ընկերությունը մուտք չի ունեցել հաճախորդների հաշիվներին:
Հիշեցնենք, որ Ֆրանսիայի եւ Մեծ Բրիտանիայի դատարանները մերժել են Դավիթ Կեզերաշվիլիին արտահանձնելու` Վրաստանի դատախազության դիմումը:
2016-ի ապրիլի 7-ին Շվեյցարիայի դատախազությունը սկսել է մի քանի բանկի, այդ թվում` BCGE-ի գործունեության ուսումնասիրությունը, որում Դավիթ Կեզերաշվիլիի հետ կապված ընկերությունը հաշիվ էր բացել:
Հետաքննող լրագրողների միջազգային կոնսորցիումի հրապարակած նյութերի համաձայն, պանամական իրավաբանական Mossack Fonseca ընկերությունը որոշ դեպքերում հաճախորդներին օգնել է փող լվալու, հարկերը թաքցնելու եւ պատժամիջոցները շրջանցելու հարցում: Հետաքննությունը հիմնված է Mossack Fonseca-ի 11,5 մլն փաստաթղթի վրա: Իրավաբանական ընկերության հաճախորդների թվում հիշատակվում են համաշխարհային նախկին եւ գործող առաջնորդներ, քաղաքական գործիչներ եւ հայտնի մարզիկներ:
