Ավելի քան 60 հազար քաղաքացու ստորագրություն, որոնք համաձայն են երկրում սահմանափակել ալկոհոլի օգտագործումը, փոխանցվել է Լիտվայի ԿԸՀ: «ՌԻԱ Նովոստին» հայտնում է, որ այդ մասին ճեպազրույցին հայտնել է «Սթափ սերունդ» հասարակական խմբի համակարգող Յուոզաս Դապշաուսկասը:

Դապշաուսկասի խոսքով, ստորագրած 61 հազար քաղաքացիներից բացի, եւս   1,766 հազարը ստորագրել է ինտերնետով:

Ստորագրահավաքի նախաձեռնողներն առաջարկում են արգելել ալկոհոլի գովազդը, ալկոհոլային խմիչքների վաճառքը թույլատրել միայն հատուկ խանութներում եւ մեծացնել տարիքը, որում կարելի է ալկոհոլ օգտագործել` սահմանված 18 տարեկանի փոխարեն հասցնելով 20-ի:

«Գիտական հետազոտությունների տվյալներով, եթե մեծացվի տարիքային ցենզը, կվերաբաշխվի նաեւ սկզբնական տարիքը: Օրինակ, այժմ մարդիկ ալկոհոլ օգտագործել սկսում են   15 տարեկանից, հետո կարող են սկսել 17 տարեկանից: Վերաձեւակերպվում է տարիքը, երբ նրանք սկսում են խմել», — լրագրողներին ասել է Դապշաուսկասը: 

Նախագիծը խորհրդարանին ներկայացնելու համար նախաձեռնողները երկու ամսում պիտի քաղաքացիների առնվազն 50 հազար ստորագրություն հավաքեին:  ԿԸՀ-ն 15 օրվա ընթացքում պիտի ստուգի ստորագրությունները եւ հաստատի, որ այս նախաձեռնությանն առնվազն  50 հազար անձ է աջակցել: Դրանից հետո նախագիծը խորհրդարանի քննարկմանը կփոխանցվի: 

Առողջապահության համաշխարհային կազմակերպության տվյալներով, Լիտվան Եվրոպայի ամենախմող երկրների եռյակի մեջ է: