Նախընտրելի
Սուխումիի կենտրոնական փողոցները երեքշաբթի ջրի տակ են մնացել հորդառատ անձրեւների պատճառով, հայտնում է «Ինտերֆաքսը»:
«Լեռներում ուժեղ անձրեւները եւ ափերից դուրս եկած գետերը Սուխումիի ողողման պատճառ են դարձել», - լրագրողներին հայտնել է քաղաքի վարչակազմի կոմունալ կառավարման պետ Ելենա Ատեպինան:
«Սուխումի գետը եւ մի քանի այլ գետ ափերից դուրս են եկել: Քաղաքում ջրի տակ է անցել Տատովի փողոցով երկրորդ անցումը, ինչպես նաեւ Լակոբայի ամբողջ փողոցը: Քաղաքի կոմունալ ծառայությունները ԱԻՆ-ի հետ բացում եւ մաքրում են կոյուղային վանդակները, ինչպես նաեւ ջրի համար ելք են բացում դեպի ծով», - հայտնել է նա:
Միաժամանակ հանրապետության ԱԻՆ-ից նշել են, որ անձրեւների կոյուղին բավարար չէ ջրի հոսքի համար նաեւ քաղաքի շրջակայքում, որտեղ ջրի տակ են մնացել մի քանի մասնավոր տների առաջին հարկերը:
Աբխազիայի արտակարգ իրավիճակների փոխնախարար Տիգրան Դելիբալթայանի խոսքով, քաղաքում ջրհեղեղների հետեւանքով դժբախտ դեպքեր չեն արձանագրվել:
Մի քանի երթուղով հանրային տրանսպորտի աշխատանքը ժամանակավորապես դժվարացել է:
