նախընտրելի դարձնելՀայաստանի գյուղատնտեսության զարգացման հիմնադրամը իր գործունեության ընթացքում 204 ուսումնական սեմինարներ է անցկացրել ագրարային վարկերի սուբսիդավորման պետական ծրագրի շրջանակներում: Այս մասին դեկտեմբերի 27-ին լրագրողների հետ հանդիպման ժամանակ նշեց հիմնադրամի գործադիր տնօրեն Գեղամ Գեւորգյանը:
Նրա խոսքով՝ այս սեմինարներին մասնակցել են 5105 գյուղացիներ, որոնցից 4,700-ը ստացել են մասնակցությունը հավաստող վկայականներ: 2017 թ. հիմնադրամը նաեւ անցկացրել է ավելի քան 40 խորհրդատվական կրթական խմբակային սեմինարներ, որոնց մասնակցել են 530 գյուղացիներ: Բացի այդ, հիմնադրամի աջակցությամբ Երեւանում կազմակերպել է 1040 գյուղատնտեսական տոնավաճառ`ավելի քան 12000 գյուղացիների մասնակցությամբ:
«2018 թվականին գյուղացիներին խորհրդատվության տրամադրման հիմնադրամի ծրագրի ճանապարհային քարտեզը ամբողջությամբ կազմված է: Դրա մշակմանը մասնակցել են ոչ միայն վարչական շրջանների ղեկավարներ, այլ նաեւ գյուղացիներ»,–նշեց Գեւորգյանը՝ հավելելով, որ կրթական սեմինարների անցկացման պիլոտային ծրագրի իրականացման համար հիմնադրամը համագործակցում է տարբեր ֆինանսական կառույցների եւ մասնագիտացված հաստատությունների հետ:
Հիմնադրամը նաեւ պետական ծրագրի շրջանակներում իրականացնում է լիզինգային աջակցության մոնիտորինգ, մասնավորապես, 2017 թվականին իրականացվել է գյուղատնտեսական վարկերի նպատակային օգտագործման՝ մասնավորապես, 16 միավոր տեխնիկայի ձեռքբերման համար տրամադրված վարկի մոնիտորինգ: 2018 թվականին նախատեսվում է իրականացնել 240 միավոր գյուղատնտեսական մեքենաների նպատակային օգտագործման մոնիտորինգ:
«2018 թվականին մենք կշարունակենք կրթական խմբակային սեմինարները, որոնք կներառեն առնվազն 750 գյուղացիների, իսկ հաջորդ տարի կմեկնարկի անասնաբուծական կոոպերատիվներին խորհրդատվության տրամադրման ծրագիրը»,–հայտնեց հիմնադրամի ղեկավարը:
Հիշեցնենք, որ Գյուղատնտեսության զարգացման հիմնադրամի ստեղծման մասին որոշումն ընդունվել էր 2017 թվականի մարտի 9-ի կառավարության նիստում: Հիմնադրամը նպատակաուղղված է լինելու ոլորտի զարգացմանն համար միջոցների կուտակմանը, մրցունակ եւ ժամանակակից գյուղատնտեսության զարգացման աջակցությանը, ինչպես նաեւ դոնորային ծրագրերի համակարգմանը:
