Հայաստանի Կոմունիստական կուսակցությունը իր խորը մտահոգությունն է հայտնում իշխանությունների կողմից ներկայացված կառավարության  կառուցվածքի փոփոխությունների  մասին օրենքի  նախագծի վերաբերյալ:  Այս մասին հայտարարություն է տարածել Հայաստանի կոմկուսը:

Հայտարարությունում նաեւ ասվում է.

«Չժխտելով օպտիմալացման միջոցով պետական  համակարգի կառավարման  արդյունավետության բարձրացման անհրաժեշտությունը  և այդ ապարատում  ոչ արդյունավետ աշխատանքի առկայությունը, այնուամենայնիվ  ստեղծվում է տպավորություն, որ  կառավարությունը  այդ խնդիրը փորձում է լուծել  մասսայական կրճատումներով:

Այդ կրճատումները  չեն հանդիսանում  արդյունավետության բարձրացման գրավական, ինչը հղի է ծանր սոցիալական հետևանքներով: Համարելով անթույլատրելի չկշռադատված և խորքային  վերլուծության  չենթարկված քայլերը, անկախ նրանից թե  այդ նախարարություններն ինչպես և ինչքանով են կարողացել լուծել  իրենց առջև դրված խնդիրները  կոչ ենք անում կառավարությանը վերանայել օրենքի նախագիծը, ցուցաբերելով խոհեմություն և շրջահայացություն չգնալ շոկային  թերապիայի ճանապարհով, որն իր կործանարար հետևանքներն է ունեցել Հայաստանում   90- ականների առաջին կեսին:

Ավելի վաղ NEWS.am_ը հայտնել էր, որ կառավարության կառուցվածքի վերաձևավորման արդյունքում ՀՀ նախարարությունների թիվը 17-ից կհասնի 12-ի։ Փոփոխությունների համաձայն` լուծարվելու է սփյուռքի նախարարությունը։ Տրանսպորտի, կապի ու տեղեկատվական տեխնոլոգիաների նախարարությունը կդառնա կապի ու բարձր տեխնոլոգիաների նախարարություն։ Տնտեսական զարգացման ու ներդրումների և գյուղատնտեսության նախարարությունները կմիավորվեն։ Աշխատանքի ու սոցիալական հարցերի նախարարությունը կմիանա տարածքային կառավարման ու զարգացման նախարարությանը։ Մշակույթի, սպորտի ու երիտասարդության նախարարությունները կմիավորվեն կրթության և գիտության նախարարությանը։ Որպես առանձին գերատեսչություններ շարունակելու են գործել ֆինանսների, արդարադատության, առողջապահության ու բնապահպանության նախարարությունները։

Նախօրեին բողոքի ակցիա էին իրականացրել Սփյուռքի նախարարության եւ Մշակույթի նախարարության աշխատակիցները: