Հայոց ցեղասպանության զոհերի հիշատակի 96-րդ տարելիցին նվիրված Թբիլիսիում երեկ` ապրիլի 23-ին,  ջահերով երթ է անցկացվել  դեպի Թուրքիայի դեսպանատուն` «Հատուցում, արդարություն, պայքար» բացականչություններով:

Վրաստանի հայ համայնքի ներկայացուցիչները Վակե Զբոսայգուց ուղեւորվել են  դեպի Թուրքիայի դիվանագիտական ներկայացուցչություն, որտեղ էլ անցկացրել են խաղաղ ակցիա եւ հանդես եկել ելույթներով, Թբիլիսիից հաղորդում է NEWS.am-ի թղթակիցը:

«Մենք կոչ ենք անում գերտերություններին միանալ  Հայոց ցեղասպանության ճանաչման, դատապարտման արդար դատին եւ պայքարին: Մենք նաեւ մեր եղբայր վրացիներին ենք կոչ անում, որ իրենք էլ  միանան մեզ եւ Թուրքիայից պահանջենք արդարություն»,- ասել է համայնքի հոգեւոր  հովիվ  Տեր Մանուկ քահանա Զենալյանը:

Իսկ Վրաստանի հայ համայնքի նախագահ Սամվել Մկրտչյանն էլ նշել է, որ չնայած գրեթե մեկ դար է անցել ողբերգությունից,  սակայն ոչինչ չի մոռացվել: «96 տարի է անցել այդ ողբերգությունից, բայց մենք չենք մոռացել տեղի ունեցածը եւ պայքարելու ենք մինչեւ հաղթանակ: Մենք չենք հաշտվելու այն մտքի հետ, որ մեզանից խլել են մեր հայրենիքի մեծագույն մասը»,- ասել է նա:

Ջահերով երթը նախաձեռնել էր  «Վրաստանի հայերի միությունը«, որին միացել էին  4  այլ կազմակերպություններ եւ հայ առաքելական եկեղեցին:

Հիշեցնենք, որ այսօր` ապրիլի 24-ին ժամը 14:00-ին Թբիլիսիում Թուրքիայի դեսպանատան առջեւ տեղի կունենա խաղաղ բողոքի ակցիա «Մենք հիշում ենք եւ պայքարում ենք հանուն արդարության» խորագրով, որի ընթացքում ակցիայի մասնակիցները կպահանջեն Թուրքիայից ճանաչել Հայոց Ցեղապսանությունը:

Տեսանյութը՝ Նվարդ Հովհաննիսյանի